Lee Vernon, 21 árs, var nýlega dæmdur í lífstíðarfangelsi fyrir að hafa myrt sex vikna son sinn. Mckenzie Ellis varð fyrir alvarlegum höfuðáverkum af völdum misþyrminga Vernon í Broadstairs í Kent á Englandi á síðasta ári. Hann lést þremur dögum síðar á gjörgæsludeild í Lundúnum.

Sky skýrir frá þessu. Fram kemur að Vernon hafi verið sakfelldur fyrir morð og alvarlega líkamsárás. Fyrir dómi sagði Vernon að sonur hans hafi verið meðvitundarlaus af óþekktum ástæðum þegar hann hringdi í neyðarlínuna þann 23. júlí 2018. Þegar neyðarvörður spurði hann hvort hann hefði meitt litla drenginn sagði hann:

„Nei, ekki þannig séð.“

Þegar lögreglan yfirheyrði hann sagðist hann hafa misst drenginn úr fangi sínu og hafi hann rekist á sófaarm áður en hann lenti á gólfinu.

Krufning leiddi í ljós að drengurinn var með marga áverka, suma hafði hann hlotið töluvert áður en hann lést.