Samkvæmt frétt The Guardian þurfti breska ríkisstjórnin meðal annars að afturkalla sölu á þremur milljónum sérsleginna mynta sem átti að selja til að fagna útgöngunni. Á myntunum átti að standa: „Friður, velmegun og vinátta við allar þjóðir“ neðan við dagsetningu Brexit. Nú þarf að bræða myntina og endurnýta segir Royal Mint sem sér um myntsláttu. Áfram er stefnt að útgáfu sérstakrar myntar þegar og ef af útgöngunni verður.
Operaton Brock var einnig slegið á frest í vikunni eftir aðeins einn dag. Þessi aðgerð snerist um umferðarstjórn í suðurhluta Englands en hún átti að tryggja að flutningabílar, á leið til meginlandsins, lami ekki umferðina. Óttast var að kílómetra langar raðir myndu myndast á breskum hraðbrautum.
Ríkisstjórnin hefur einnig frestað upplýsingaherferðinni Get Ready for Brexit. Sjónvarpsauglýsingar og auglýsingar á samfélagsmiðlum áttu að vekja athygli landsmanna á heimasíðu þar sem hægt er að fá upplýsingar sem snúast um lífið eftir Brexit.