Meðlimir í dönsku nýnasistahreyfingunni Den Nordiske Modstandsbevægelse NordFront hafa í vikunni dreift flugritum í Slangerup í Frederiksssund. Íbúar í bænum hafa fengið þessa flugrit í póstkassa sína. Þá hafa veggspjöld og límmiðar einnig verið hengdir upp víða um bæinn.

Bæjarstjórinn, John Schmidt Andersen, hvetur bæjarbúa til að henda flugritunum beint í ruslið án þess að lesa þau.

„Hendum skítnum beint í ruslið.“

Sagði hann í samtali við sn.dk og að yfirvöld muni gefa því auga hvort ákveðnir bæjarbúar sýni merki um meiri róttækni í skoðunum en áður.

Hjá lögreglunni segja menn að áróður nýnasistanna sé ekki ólöglegur enda ríki tjáningarfrelsi í landinu en vakandi auga sé haft með hvort nýnasistarnir brjóti gegn ákvæðum hegningarlaga um að ekki megi smána, ógna eða gera lítið úr fólki vegna kynþáttar, uppruna, trúar eða kynhneigðar.

Á heimasíðu Nordfront kemur fram að samtökin vilji „ná völdum aftur af hinni alþjóðlegu síonísku elítu“. Auk þess vilja samtökin að þeir sem gegna herskyldu fái að halda vopnum sínum að henni lokinni og að samkynhneigðum verði bannað að ganga í hjónaband og ættleiða börn.