Þessir fordæmulausu tímar sem við búum nú við hafa kallað á að fólk hugsi út fyrir kassann. Heildsalan Bakó Ísberg gerir það svo sannarlega en næstu vikuna munu þeir bjóða landsmönnum að fá matreiðslukennslu frá kokk beint heim í stofu í gegnum streymi á Facebook. Kokkarnir eru ekki af verri endanum, en Bubbi sjálfur Morthens mun ríða á vaðið og kenna landsmönnum að útbúa safann Eitur Pésa klukkan 13:00 á morgun.
Í tilkynningu um viðburðinn segir:
„Á Íslandi eru ótal góðir veitingastaðir sem hafa fengið frábæra dóma í fjölmiðlum um víða veröld, en á bak við hvern veitingastað standa vaktina frábærir veitingamenn sem hafa borið hróður íslenskrar matarmenningar ekki bara á Íslandi heldur um allan heim.
Á þessum fordæmalausu tímum sem við og heimurinn allur erum að upplifa í dag þá stendur illa á hjá veitingastöðum, því vegna samkomubanns hafa flestir matsölustaðir lokað, annað hvort að fullu eða að hluta. Margir veitingastaðir bjóða þó upp á heimsendingar og / eða þá að fólk geti sótt matinn beint á staðinn og tekið með heim.
Við hjá Bakó Ísberg höfum ákveðið að leggja okkar á lóðarskálarnar og ætlum að bjóða Íslendingum upp á þá þjónustu að fá kokkinn beint heim í stofu í gegnum svokallað streymi á Facebooksíðu Bakó Ísberg eða beint frá eldhúsi allra landsmanna.
Við höfum valið bæði frábæran hóp veitingamanna til að taka þátt í þessu með okkur sem og þekkta ástríðukokka sem munu elda fyrir okkur og kenna okkur eitthvað nýtt á hverjum degi yfir 8 daga tímabil“
Eins og áður segir hefst fyrsta streymið á morgun klukkan 13:00 og þá getur þú lesandi kær fengið Bubba sjálfan inn í stofu heim til þín, með liðsinni tækninnar, í einkakennslu í safagerð, en samkvæmt tilkynningu telur tónlistarmaðurinn knái þennan safa heldur betur geta bætt ónæmiskerfi landsmanna.
Streymið má finna hér á Facebook síðu Bakó Ísbergs – athugið þó að það hefst ekki fyrr en 13:00 á morgun, miðvikudag.
Dagskráin er svohljóðandi