Fyrst urðu viðskiptavinirnir fúlir vegna þess að rörin áttu það til að molna á milli varanna á fólki þegar það var að gæða sér á gosdrykk eða mjólkurhristingi.
Nú hefur enn alvarlegra vandamál skotið upp kollinum. Dagblaðið The Sun hefur skýrt frá því að það sé ekki hægt að endurnýta rörin, þrátt fyrir að það hafi verið tilgangurinn með því að taka þau í notkun.
McDonalds hefur haldið því fram að hægt sé að endurnýta rörin að fullu. En samkvæmt skjali sem The Sun hefur undir höndum er sú ekki raunin. Þess í stað eru rörin brennd.
Þversögnin í þessu máli er sú að plaströrin sem skipt var út fyrir papparörin er hægt að endurvinna.
Málið vakti mikla athygli á Bretlandi og hafa fjölmargir fjölmiðlar tekið það upp. Gagnrýninni rignir yfir McDonalds og er fyrirtækið sakað um að hafa skipt um rör eingöngu til að fá jákvæða umfjöllun.
„Fólk veltir því fyrir sér hvort þetta hafi bara verið gert til þess að líta út fyrir að vera grænni, eða hvort þetta sé algjört klúður“, segir Ed Davey, fyrrverandi umhverifsráðherra Breta í viðtali við The Sun.
McDonald hefur staðfest það við The Sun að rörin séu ekki endurunnin.
„Við erum búin að styrkja pappírsrörin okkar og þrátt fyrir að hægt sé að endurvinna efnið sem þau eru búin til úr, þá gerir þykkt þeirra það að verkum að erfitt er fyrir ruslaflokkunina að vinna úr þeim“, segir talsmaður McDonalds. „Við erum að vinna að lausn. Þess vegna er það aðeins tímabundið sem rörunum er hent í ruslið“.
Búið er að tilkynna um innleiðingu papparöranna á McDonalds í Bandaríkjunum, Frakklandi, Svíþjóð, Danmörku og Noregi.