Einar Kárason, íþróttafræðingur og knattspyrnuáhugamaður, keypti sér snakk frá Stjörnusnakki á dögunum og trúði vart eigin augum þegar hann dýfði sér í pokann. Einar fann einstaka flögu sem hann hafði ekki séð í mörg ár – Pizzahringinn. Einar brá á það ráð að skrifa Stjörnusnakki bréf til að grennslast fyrir um þessa fornu flögu.
„Góðan dag. Ég varð fyrir þeirri skemmtilegu uppákomu þegar ég var að borða ykkar úrvals Stjörnusnakk að ein flagan var ekki eins og hinar. Hún tók mig mörg ár aftur í tímannn, sem ekki kemur á óvart, þar sem þetta var hinn eini sanni Pizzahringur (man nafnið ekki 100% en mig rámar í þetta). Því langar mig að spyrja: Finn ég þá tegund snökka einhvers staðar árið 2019? Ef ekki, af hverju ekki?“ skrifar Einar í bréfi til Stjörnusnakks sem hann deilir á Twitter.
„Ég tók mynd af flögunni til sönnunar. Nú veit ég hvernig fornleifafræðingum líður. Flagan var ekki borðuð og verður geymd.
Kær snakkarakveðja,
Ykkar aðdáandi,
Einar,“ bætir hann við.
Læt vita með gang mála við fyrsta tækifæri. #snakktwitter #snökk pic.twitter.com/NCEZSTPN4w
— Einar Kárason (@einarkarason) April 30, 2019
Í samtali við Einar fagnar hann áhuga blaðamanns á málinu og segir að það verði að „berast sem víða.“ Hann hefur ekki enn fengið svar frá Stjörnusnakki, en DV mun fylgjast grannt með þessu máli.