„Jú, það hefur mikið gengið á í verksmiðjunni undanfarna daga,“ segir Hrafnhildur Hermannsdóttir, einn eigenda Eldum rétt, en fyrirtækið fagnar fimm ára afmæli sínu um þessar mundir. Matarvefnum barst til eyrna að bróðir Hrafnhildar, Valur Hermannsson, sem jafnframt er einn af eigendum Eldum rétt, hafi lagt mikið á sig í undirbúningi fyrir afmælið.

„Það verður ekki tekið af Val bróður að hann er harður af sér, en hann var hérna haltrandi með staf að pakka inn, þar sem honum tókst að nánast ökklabrjóta sig í fótbolta kvöldið áður. Það er ástríða í þessu hjá okkur fjölskyldunni,“ segir Hrafnhildur og brosir.

Í raun hafa flestir starfsmenn Eldum rétt, þar á meðal forritarar og framkvæmdastjórar, skellt sér í önnur hlutverk það sem af er vikunni, klætt sig í hlífðarfatnað og pakkað matarpökkum fyrirtækisins sökum anna. Eigendur Eldum rétt ákváðu nefnilega að halda upp á fimm ára afmælið með því að lauma vinningum í nokkra matarpakka frá fyrirtækinu til 16. maí. Í fyrstu átti aðeins að bjóða einni fjölskyldu til Krítar í boði Eldum rétt í afmælisleiknum, en nú er búið að tvöfalda vinningana þannig að tvær fjölskyldur eiga kost á að komast í sólina.

„Núna eru því tvær bronsplötur, tvær silfurplötur og tvær gullplötur, í umferð. Bronsplata þýðir að sá sem hana finnur í pakkanum sínum hefur unnið 70 þúsund króna gjafabréf í Snúruna, silfurplata gefur gistingu í Deluxe herbergi á Hótel Húsafelli, fyrir tvo, ásamt fjögurra sælkerakvöldverð og gullplata gefur flug og gistingu fyrir alla fjölskylduna á Krít í tólf daga,“ segir Hrafnhildur.

Eins og áður segir eru fimm ár síðan Eldum rétt var stofnað af fyrrnefndum Val Hermannssyni og Júlíusi Leifssyni. Fyrirtækið hefur vaxið jafnt og þétt og var hagnaður þess árið 2017 ríflega 81 milljón króna og 78 milljónir króna árið áður.