Þórdís Ólöf Sigurjónsdóttir er nemi á þriðja ári í arkitektúr við LHÍ. Þórdís hefur brennandi áhuga á matargerð, næringu og heilsu. Hún heldur úti uppskriftarsíðunni Grænkerar.is. Þórdís er vegan og hefur verið það síðan 2016.
DV vildi vita hvað matarbloggari eins og Þórdís borðar á venjulegum degi. Hún deilir einnig ljúffengri uppskrift að tortillum með svartbaunamauki.
Hvernig er venjulegur dagur hjá þér?
„Venjulegur dagur hjá mér byrjar á morgunæfingu í ræktinni eða sundspretti í Vesturbæjarlaug. Fyrir hálfu ári prófaði ég 16/8 föstuna. Mér leið vel af því að borða í þessum takti og hef því haldið mig að mestu við það síðan,“ segir Þórdís Ólöf.
„Skólinn byrjar oftast ekki hjá mér fyrr en klukkan 10 eða seinna og tek ég þá morgunmatinn með mér í skólann og borða hann um hádegi. Ég reyni að vera komin heim um þrjú og fæ mér þá heita og matarmikla máltíð. Suma daga koma svo nemendur til mín í stærðfræði- eða eðlisfræðikennslu seinnipartinn.“
Þórdís elskar að gefa sér góðan tíma til að elda kvöldmat og borða með fjölskyldunni. Kvöldin eru svo vel nýtt í að vinna skólaverkefni. „En þegar ég vil gera vel við mig fer ég í langt heitt bað eða les góða bók.“
Ertu búin að ákveða fyrir fram hvað þú ætlar að borða þann dag eða ferðu eftir tilfinningunni?
„Ég undirbý oftast fyrstu máltíð dagsins, sem ég borða reyndar um hádegi. Best finnst mér að gera hafragraut sem er látinn standa í ísskáp yfir nótt og borðaður kaldur (overnight oatmeal). Aðrar máltíðir skipulegg ég ekki, heldur ræðst matarval af löngun og því sem til er í ísskápnum hverju sinni,“ segir Þórdís Ólöf.
Hvað hefurðu verið vegan lengi?
„Ég varð vegan fyrir um þremur árum. Ég hafði aðeins skoðað áhrif dýraiðnaðarins á umhverfið og ákvað eitt kvöldið að horfa á Cowspiracy. Ég varð vegan sama kvöld. Núna er ég vegan fyrst og fremst vegna dýraverndar og umhverfisverndar, en heilsan spilar ekki síður inn í.“
Hverjir eru uppáhalds vegan próteingjafarnir þínir?
„Ég er sérstaklega hrifin af baunum á borð við kjúklingabaunir, svartbaunir og linsubaunir. Einnig er ég mjög veik fyrir Oumph sem er sojakjöt og minnir á kjúkling. Ég borða líka mjög mikið af hnetum og grænmeti, en það eru oft vanmetnir próteingjafar.“
Morgunmatur:
Þegar ég vakna fæ ég mér heitt rauðrunnate eða kaffi en um hádegi borða ég kaldan hafragraut sem ég hef útbúið kvöldið áður. Grauturinn er úr höfrum, chia-fræjum, plöntumjólk og plöntujógúrt og blanda ég gjarnan frosnum hindberjum, kanil, hnetusmjöri og skorinni döðlu saman við.
Hádegismatur:
Ég borða „hádegismatinn“ oftast um þrjú og finnst mjög gott að fá mér tortillu með svartbaunamauki og guacamole. Ef ég næ ekki að borða hádegismatinn heima tek ég oftast með mér afganga frá kvöldinu áður eða gríp með mér grænmeti og hummus.
Millimál:
Epli með hnetusmjöri og hrökkkex með hummus eru frábær millimál. Einnig geymi ég stóra krukku með hnetum, kókosflögum og trönuberjum uppi í skóla og get naslað á því.
Kvöldmatur:
Brokkólí og annað grænmeti, baunir og Oumph! steikt á pönnu og bragðbætt með tilviljanakenndum hætti er mjög týpískur kvöldmatur á mínu heimili. Einnig er ég sérlega veik fyrir heimagerðum pítsum og bý mér til pítsu í kvöldmat oftar en ég þori að segja frá.
Hráefni:
2 dósir svartbaunir, skola vel
1 krukka salsasósa
2-3 msk taco krydd
1-2 dl skorið grænmeti, t.d. laukur, paprika og tómatur
Aðferð:
