Veitingamaðurinn Sigmar Vilhjálmsson undirbýr nú opnun veitingastaðarins Barion Bar í Mosfellsbæ, en hann dvelur um þessar mundir í Singapúr eins og hann hefur sýnt fylgjendum sínum á samfélagsmiðlum.
Meðal þess sem Sigmar hefur gert sér til dundurs hinum megin á hnettinum er að borða góðan mat og sitja fyrirlestra á ráðstefnunni Global Restaurant Leadership þar sem allt það nýjasta í veitingabransanum er rætt. Sótti Sigmar til að mynda fyrirlestur hjá engum öðrum en Kanadamanninum Jack Corwin. Þótt hann sé nafn sem fáir á Íslandi þekkja þá er hann risastórt nafn í matarheimum.
Jack á sérleyfi fyrir skyndibitakeðjuna Burger King í Ástralíu, sem heitir Hungry Jack’s þar í landi, en staðirnir eru orðnir yfir fjögur hundruð. Jack skapaði sér nafn þegar hann flutti frá Kanada til Ástralíu árið 1969 og keypti sérleyfið til að opna tíu KFC-staði í Vestur-Ástralíu. Græddi hann á tá og fingri og er í dag metinn á tæplega tvo milljarða dollara.
Ljóst er að Jack hefur mikla þekkingu á að festa sér sérleyfi að veitingastöðum, sem og aðrir sem halda tölu á ráðstefnunni í Singapúr. Því liggur beinast við að velta fyrir sér hvort Sigmar hafi í hyggju að færa Íslendingum einhverja heimsþekkta veitingastaðakeðjur í nánustu framtíð?