Fjölmiðlamaðurinn Logi Bergmann Eiðsson er spurður spjörunum úr í jólablaði Morgunblaðsins. Hann segir jólahátíðina sína mjög íhaldssama.
„Aðfangadagur. Matur klukkan sex og svo pakkarnir opnaðir og kortin lesin og svo vakað fram eftir með góða bók,“ segir hann.
Það sem hefur þó bjargað jólunum er skipulagskunnátta eiginkonu Loga, Svanhildar Hólm, aðstoðarkonu fjármálaráðherra.
„Við eigum samtals sjö börn þannig að þetta er soltið utanumhald. Við vinnum alltaf með eitt Excel-skjal þar sem við setjum inn gjafirnar og hvað hver eigi að fá og hvernig staðan er á því. Svo er annað sem heldur utan um jólamatarinnkaupin, sem er að grunninum til frá fyrstu jólunum okkar Svanhildar. Þar er allt það helsta listað upp, í hvaða búð það fáist og meira að segja í hvaða deild. Ég hélt að hún væri klikkuð þegar hún lét mig fá það, en ég er löngu búin að viðurkenna hversu mikil snilld þetta er.“
En hvað ætli Svanhildur og Logi borði í jólamat?
„Við erum alltaf með hamborgarhrygg á aðfangadag og hangikjöt á jóladag. Nú verður hinsvegar breyting á því við ætlum að halda jólin á Kanarí með tengdaforeldrum mínum. Þau hafa alltaf komið til okkar en nú er röðin komin að okkur. Þannig að ég veit ekkert hvað við borðum og veit ekki alveg hvað mér finnst um það!“