Íris Andradóttir, blaðamaður hjá norska sakamálaþættinum Åsted Norge, vinnur að rannsókn á máli Tommy Plath, 17 ára pilts sem hvarf fyrir nærri 60 árum og fannst síðar látinn í Noregi við dularfullar aðstæður.
Í færslu sinni í Facebook-hópnum Gamlar ljósmyndir spyr Íris: „Kannast þú við Tommy Plath?
„Tommy hvarf frá heimili sínu í Svíþjóð 11. eða 12. júlí árið 1966 og fannst látinn í Noregi um það bil mánuði síðar. Enn þann dag í dag hefur ekki tekist að komast að dánarorsök hans.
Ástæða þess að rannsóknin hefur leitt okkur til Íslands er sú að þegar Tommy fannst látinn var líka fundin kvittun frá Hótel Loftleiðum í vasa hans. Hann hefur þá sennilega dvalið á hótelinu dagana 13.-15. júlí 1966 undir fölsku nafni, Anders Karlsson.“
Íris segir að rannsóknin hafi þannig leitt þáttagerðarfólkið til Íslands þar sem þau reyni nú að komast að því hvað Tommy var að gera á Íslandi og hvort einhver hafi séð hann eða hitt á þeim tíma. Íris segir allar upplýsingar geta skipt máli.
„Ef þú aðeins kannast við nafnið (hvort sem það er Tommy Plath eða Anders Karlsson) væri það líka áhugaverðar upplýsingar. Þú getur sent mér skilaboð hér á Facebook, eða gegnum netfangið iris.andradottir@mastiff.no.“
Þessi frétt birtist um Tommy í Alþýðublaðinu 30. ágúst 1966.
Þann 16. júlí árið 2022 birti Thomas Robertsen sambærilega færslu í Facebook-hópnum Aðdáendaklubbur Loftleiða. Í færslunni sem er á ensku segir Robertsen:
„Hæ. Ég heiti Thomas Robertsen og er frá Noregi. Ég er nú að vinna að rannsóknum fyrir bók um dularfullan dauðdaga 17 ára sænsks drengs að nafni Tommy Plath. Hann fannst látinn fyrir utan norsku borgina Horten í júlí 1966.
Það eru nokkrar undarlegar aðstæður í þessu máli. Ein þeirra er að ungi drengurinn fannst með kvittun frá Hótel Loftleiðum á Íslandi. Samkvæmt kvittuninni hafði hann eytt tveimur dögum á hótelinu, frá 13. til 15. júlí 1966.
Talið er að hann hafi ferðast með Loftleiðum frá Þórslandi í Svíþjóð til Reykjavíkur 13. júlí og með Loftleiðum frá Reykjavík til Óslóar (Fornebu) 16. júlí. Ef einhver í þessum hópi man eitthvað eftir þessu máli eða veit hvert ég get leitað til að fá frekari upplýsingar, þá væri ég mjög þakklátur. Með bestu kveðjum, Thomas Robertsen.“
Aðspurður um hvort Tommy hafi ferðast hingað til lands undir þriðja nafninu svarar Robertsen:
„Tommy fór greinilega til Íslands undir nafninu Anders Karlsson. Samkvæmt vinum og nánum vandamönnum var Tommy hógvær, næstum því innhverfur, ungur maður. Að ferðast til Íslands virtist mjög óljóst og það var óhugsandi að segja ekki fjölskyldu sinni frá því fyrirfram. Íslenska lögreglan virðist hafa gert ítarlegar rannsóknir. Hún athugaði allar flugvélar, og reyndar skip, sem komu og fóru frá Íslandi á þeim tíma. Hún fann enga farþega með nafninu Tommy Plath eða Anders Karlsson. Þannig að maður mætti búast við öðru fölsku nafni. Góður punktur!“
Segist Robertsen opinn fyrir öllum hugmyndum og kenningum um hvað Tommy var að gera hérlendis.
„Hann fór frá heimili sínu í Sävsjö í Svíþjóð, að því er virtist vera í einhverjum flýti. Að mínu mati var hann knúinn áfram af einhverju öðru en að heimsækja Ísland sem ferðamaður. Þann 17. júlí 1966 fannst ferðataska og var skilað á lestarstöðina í miðbæ Horten. Þegar Tommy fannst 14. ágúst benti einhver á að taskan væri líklega hans. Í töskunni voru nokkrir hlutir sem bentu til Loftleiða. En hvorki á Íslandi né í Svíþjóð eða Noregi virtist neinn hafa séð til Tommy. Það voru ekki mörg föt í töskunni sem gæti bent til þess að hann hafi ekki skipulagt langferð. Ef ég man rétt var Loftleiðir lúxushótel sem opnaði í maí sama ár.“
