Kona var handtekin í síðasta mánuði á flugvellinum í Baltimore með ferðatösku fulla af kannabis á leið til Íslands. Er mun arðbærara að selja kannabis í Evrópu en í Bandaríkjunum.

Fréttastofan CBS greinir frá þessu.

Konan er 22 ára gömul og er frá Kaliforníufylki í Bandaríkjunum. Hún var handtekin á BWI Thurgood Marshall flugvellinum í Baltimore þann 25. febrúar eftir að fíkniefnin fundust í fórum hennar.

Um var að ræða um fimmtán kílógrömm af marijúana sem fundust í tösku sem verið var að ferja í vél til Keflavíkur. Talið er hins vegar að endastöð efnanna hafi ekki verið Ísland heldur átti konan flug héðan til Lundúna í Bretlandi.

Tvöfalt eða þrefalt hærra verð

Fíkniefnin voru geymd í 30 loftinnsigluðum plastpokum. Talið er að götuvirði þeirra í Bandaríkjunum geti verið allt að150 þúsund dollarar, eða rúmlega 20 milljónir króna. Það fer þó eftir styrk efnanna og gæða. Hins vegar er hægt að fá tvöfalt eða þrefalt hærra verð í Evrópulöndum en í Bandaríkjunum fyrir efnin.

Forsvarsmenn bandarískra tollgæsluyfirvalda segjast hafa tekið eftir aukningu í útflutningi marijúana til bæði Evrópu og Afríku. Yfirleitt er um mun minna magn en þetta samt.