Páll Magnússon, forseti bæjarstjórnar Vestmannaeyja, segir fullkomið stjórnleysi ríkja í málefnum hælisleitenda hér á landi, og rekur dæmi Palestínumanns sem lenti í hnífaslagsmálum hér á landi fyrir skömmu.

Páll bendir á að umsókn þessa manns um pólitískt hæli hér á landi hafi verið hafnað árið 2022. Tæpu ári eftir komu hans hingað til lands hafi honum síðan verið vísað brott frá landinu. Engu að síður hafi hann verið staddur hér fyrir skömmu og brotið af sér. Páll rekur sögu mannsins með þessum orðum:

„Í nóvember 2021 kom þrítugur Palestínumaður til Íslands og sótti um hæli sem pólitískur flóttamaður. Þrátt fyrir að maðurinn hefði þegar fengið vernd í Grikklandi og væri með gilt grískt vegabréf var honum ekki snúið þangað aftur heldur umsókn hans tekin til efnismeðferðar – og hafnað. Tæpu ári eftir komuna til landsins, í október 2022, komust yfirvöld að þeirri niðurstöðu að til að framfylgja brottvísun þyrftu lögreglumenn að fylgja manninum úr landi – til Grikklands. Í kjölfar mats á þeirri hættu sem stafaði af manninum var ákveðið að þrír lögreglumenn skyldu fylgja honum, en ekki tveir eins og vaninn er. Einnig var óskað eftir því að tekin yrði frá aftasta röðin í flugvélinni – og næsta röð fyrir framan hana ef hægt væri.“

Páll segir ennfremur:

„Ferðin gekk vel – gríska lögreglan tók á móti manninum í Aþenu og íslensku lögreglumennirnir þrír komu heim til Íslands 12. október. En daginn eftir, 13. október, kom Palestínumaðurinn líka aftur til Íslands. Og þrátt fyrir brottvísun í lögreglufylgd og endurkomubann var honum hleypt aftur inn í landið. Og hér er hann enn. Það síðasta sem fréttist af honum var í hnífabardaga í Fossvogi í fyrradag. Hann var sem sagt annar aðilinn í fréttinni sem fylgir hér með.“