Stefán Pálsson, sagnfræðingur, stjórnmálaskýrandi og varaborgarfulltrúi, segir að í umræðunni um „taktískar kosningar“ éti hver upp eftir öðrum að það sé hættulegt fyrir flokka að mælast undir mörkum. Þá hætti kjósendur unnvörpum við að kjósa þá af ótta við að atkvæðin falli dauð.

Sjálfur er Stefán ekki sannfærður um þetta og telur raunar að sagan styðji illa þessa kenningu.

„Þvert á móti hefur það einmitt margoft sýnt sig að það að standa tæpt geti komið sér vel í kosningabaráttu – einmitt vegna þess að í lífróðri finnst kjósendum að atkvæðið sitt vegi meira en ella,“ segir Stefán í athyglisverðum pistli á Facebook-síðu sinni.

„Ragnar Arnalds heitinn varð aldrei glaðari en þegar honum tókst að finna verstu skoðanakönnunina fyrir Alþýðubandalagið í Norðurlandskjördæmi-vestra og gat þá sent út stríðskallið þess efnis að Gagginn væri í hættu! Sigurður Ingi er farinn að gera slíkt hið sama og mun eflaust uppskera vel,“ segir hann og nefnir svo annað dæmi.

„Skemmtilegasta dæmið er þó úr borgarstjórnarkosningunum 1990 þar sem Sigrún Magnúsdóttir mátti heita örugg inn, en Framsóknarmönnum tókst að finna eina skoðanakönnun sem sýndi hana naumlega úti. Í kjölfarið var svo keyrt á auglýsingum um að Sigrúnu vantaði 120 atkvæði og ljósrituð frétt af skoðanakönnuninni var borin í öll hús. Sigrún var auðvitað aldrei í neinni hættu, varð tíundi borgarfulltrúi af fimmtán og nær því að taka annan mann með sér en að falla sjálf úr borgarstjórn.“

Nokkrir rótgrónir stjórnmálaflokkar eiga í vandræðum þessa dagana miðað við skoðanakannanir nú þegar innan við vika er til kosninga. Þannig hafa Framsóknarflokkurinn og Píratar dansað í kringum fimm prósentin síðustu daga og vikur og þá hefur VG mælst vel undir fimm prósentum síðustu vikurnar.