Lögmaður Náttúruverndarsamtaka Íslands og talskona Hvalavina segja konurnar tvær sem hafa hlekkjað sig við Hval 8 og 9 í friðsamlegum mótmælum og stundi borgaralega óhlýðni. Óvíst sé um áhrif.
„Þessar konur eru að nýta sér stjórnarskrárbundinn rétt sinn til tjáningar og mótmæla því sem þær telja vera yfirvofandi brot gegn lögum um velferð dýra,“ segir Katrín Oddsdóttir, lögmaður Náttúruverndarsamtaka Íslands.
Hún segir málið ekki fordæmalaust.
Frá vettvangi mótmælanna
„Þetta er alls ekki í fyrsta sinn sem við sjáum þessa tegund af borgaralegri óhlýðni í tengslum við hvalveiðar Íslendinga.“
Aðspurð um áhrif segist Katrín ekki hafa nægilega öfluga spádómsgáfu til að segja til um það
Katrín segist ekki vita til þess að konurnar tvær, sem heita Eliza og Anahita, séu á vegum neinna samtaka. Það segist Valgerður Árnadóttir, talskona Hvalavina, heldur ekki vita en hún er á svæðinu.
„Þetta eru konur sem ákváðu upp á sitt einsdæmi að gera þetta,“ segir Valgerður. „Við í Hvalavinum styðjum friðsamlegar mótmælaaðgerðir. Mér finnst þær hugrakkar að hafa gert þetta. Þær eru að standa vörð um réttindi dýra. Það er verið að brjóta dýravelferðarlög með því að murka úr hvölum lífið. Hver einasti hvalur sem bjargast vegna þessara aðgerða skiptir máli.“
Valgerður býst ekki við því að skipin sigli út í dag og því hafi mótmælin einhver áhrif. „Þeir geta að minnsta kosti ekki farið neitt á meðan þær sitja þarna. Það hefur þá alla vega einhver áhrif,“ segir hún.
Lítið er að gerast á svæðinu og hálfgerð pattstaða komin upp. Nokkuð af fréttafólki og áhorfendum hefur safnast fyrir á höfninni. Sérsveit lögreglunnar er ekki að ræða við konurnar og ekki í neinum sjáanlegum aðgerðum.
Valgerður segir að veðrið sé gott og það væsi ekki um konurnar. „Fyrst að ráðherra stöðvar þetta ekki eru borgararnir komnir í það mál,“ segir hún.
