Eins og alþjóð veit endaði íslenska karlalandsliðið í handbolta í 12. sæti á HM í Danmörku og Póllandi, sem enn stendur yfir, þó að Íslendingar hafi lokið keppni. Árangurinn er mörgum vonbrigði en deilt er um hvort liðið hafi staðið sig vel eða ekki og hvort Guðmundur Guðmundsson eigi að halda starfi sínu sem landsliðsþjálfari.

Einn helsti gagnrýnandi liðsins er Logi Geirsson, fyrrverandi landsliðsmaður og silfurverðlaunahafi á Ólympiuleikunum 2008. Gagnrýni Loga og annarra álitsgjafa hefur oft vakið gremju Guðmundar.

Í nýrri færslu á Twitter nefnir Logi fimm atriði sem verði að breytast ef Guðmundur eigi að halda áfram að þjálfa liðið. Í fyrsta lagi verði hann að nota allt liðið, en Guðmundur hefur verið gagnrýndur fyrir að keyra um of á sömu mönnunum. Í öðru lagi þurfi hann að sýnt vott af auðmýkt og ábyrgð. Í þriðja lagi verði hann að bregðast betur við á meðan leik stendur. Í fjórða lagi eigi Guðmundur að hætta að tala liði niður og tala andstæðinginn upp. Í fimmta lagi: „Halda coolinu“.

Fékk spurningu áðan um að ef Gummi Gumm yrði áfram með liðið hvað myndi ég vilja sjá breytast?

Svarið var einfalt.

#1. Nota allt liðið.
#2. Sýna vott af auðmýkt og ábyrgð.
#3. Bregðast betur við inn í leiknum.
#4. Hætta að tala liðið niður og hin upp.
#5. Halda coolinu

— Logi Geirsson (@logigeirsson) January 26, 2023