Jarðskjálfti upp á 5,1 Richterkvarða reið yfir um kl. 22.22 í kvöld en upptök hans voru um 1,6 kílómetrum suðvestur af Keili. Um er að ræða stærsta skjálfta sem orðið hefur síðan jarðhræringar hófust að nýju á eldsumbrotasvæðinu á Reykjanesi.
Benedikt Ófeigsson, jarðeðlisfræðingur hjá Veðurstofu Íslands, sagði fyrir stundu að gosið gæti á hverri stundu í viðtali við RÚV fyrr í kvöld en allt benti til þess að kvika væri mjög nálægt yfirborðinu á milli Litla-Hrúts og Keilis.
„Það er þannig, það gæti gosið á hverri stundu. Það er náttúrulega ekkert hægt að útiloka að eitthvað annað gerist, að þetta stöðvist, en það bendir allt til þess að það sé að byrja gos,“ sagði Benedikt.
Aðspurður sagði hann ekki hægt að útiloka það að eitthvað annað gerist, og það gjósi ekki. Það sé þó mjög ólíklegt.
