Ferðalangurinn Þorsteinn Gunnarsson hætti á dögunum við að gista þrjár nætur á Keahótelinu á Akureyri og fór þess í stað til Tenerife. Ástæðan var gríðarlega hátt verð á hótelgistingu hér á landi. Fjallað er um málið í Fréttablaðinu í dag.
Þorsteinn hafði ætlað að gista á Keahótelinu 7.-10. júlí en komst að því að verðið var 263 þúsund krónur, eða 87.55 krónur með morgunverði nóttin fyrir tveggja manna herbergi.
„Ég er fullkomlega hneykslaður, þetta eru klikkuð verð og komin út yfir allt velsæmi,“ segir Þorsteinn í samtali við Fréttablaðið sem kemst að þeirri niðurstöðu að ferðaþjónustan hér á landi sé ekki hugsuð fyrir Íslendinga.
Hann hætti síðan við Akureyrarferðina og fór þess í stað til Tenerife.
Oft er það þannig að þegar bókað er á síðustu stundu er verðið lægra en ella. Því er hins vegar öfugt farið þegar kemur að bókunum á hótelherbergjum hér á landi en verðið sé í hæstu hæðum þegar bókað er á síðustu stundu.
Snorri Pétur Eggertsson, framkvæmdastjóri sölu- og markaðssviðs Keahótelanna, staðfestir að verð herbergis geti rokið svona upp ef um síðustu herbergin sé að ræða. Hann véfengir ekki tölur Þorsteins frá Akureyri.
Snorri vísar því á bug að græðgi sé orsök verðlagningarinnar. Hótelverð hafi hækkað um 50 prósent síðan í fyrrasumar. Heimsfaraldurinn, framboð og eftirspurn skýri þessar breytingar.
„Bjargræðistíminn okkar er þrír mánuðir. Við reynum að fá sem mestar tekjur frá útlendingunum og stílum nánast eingöngu á þá.“
