Lögreglan hafði afskipti af tveimur konum í matvöruverslun í Miðborginni í gær en þær voru staðnar að þjófnaði. Þær voru fluttar á lögreglustöð þar sem skýrslur voru teknar af þeim. Að því loknu var þeim sleppt.

Átta ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna.

Þrír ökumenn voru kærðir fyrir of hraðan akstur. Sá sem hraðast ók mældist á 125 km/klst þar sem leyfður hámarkshraði er 80 km/klst.

Einn ökumaður var kærður fyrir að aka á nagladekkjum.

Skráningarnúmer voru fjarlægð af þremur ökutækjum sem voru annað hvort ótryggð eða óskoðuð.

Í Árbæjarhverfi var maður í annarlegu ástandi handtekinn því hann neitaði að yfirgefa húsnæði sem hann var ekki velkominn í. Hann hafði einnig í hótunum við lögreglu. Hann var vistaður í fangageymslu.