Kolbrún Baldursdóttir, oddviti Flokks fólksins í borgarstjórn, er lítið fyrir margar fjárfestingar sem Reykjavíkurborg hefur gert á undanförnum árum.
„Flokkur fólksins hefur ítrekað gagnrýnt meirihluta borgarstjórnar fyrir bruðl með fjármuni Reykvíkinga og kallað eftir nauðsynlegri virðingu fyrir verðmætum, aga og ráðdeild. Borgarbáknið hefur þanist út, margar fjárfestingar eru í senn ómarkvissar og óhagkvæmar og staðið er í samkeppnisrekstri utan verkahrings borgarinnar,“ segir hún í pistli sem birtist á Vísi í dag.
Í pistlinum fer Kolbrún yfir það sem henni finnst borgin hafa sóað peningum í og það fyrsta sem hún nefnir er Sorpa. „Hjá Sorpu reka hver mistökin önnur á kjörtímabilinu, þar sem enn og aftur þarf að greiða skaðabætur fyrir mistök stjórnenda,“ segir hún.
„Sorpa er dæmd til að greiða Íslenskum aðalverktökum tæpar 90 milljónir króna vegna mistaka við útboð byggingar á gas- og jarðgerðarstöð á Álfsnesi. Sorpa braut lög um opinber innkaup þegar fyrirtækið samþykkti að ganga til samninga við Ístak. Stjórn Sorpu ber á þessu ábyrgð og þarf að axla hana. Sá er hængur á stjórn SORPU að þar er ekki gerð nein krafa um að stjórnarmenn hafi reynslu eða þekkingu á þessum málum.“
Kolbrún spyr þá hvort þetta „meinta kunnátuleysi“ tengist þeirri röð mistaka sem átt hefur sér stað hjá fyrirtækinu á kjörtímabilinu.
GAJA, gas- og jarðgerðarstöð Sorpu, fær sinn eigin kafla í pistlinum hennar Kolbrúnar enda eiga þau mistök það alveg skilið. Markmiðið með stöðinni var að búa til nothæfa moltu og seljanlegt metan úr óflokkuðu sorpi. Margir töldu fyrirætlanirnar óraunhæfar og hefur það sannast þar sem Sorpa selur sáralítið magn af metani. Þá er moltan ónothæf þar sem of mikið magn af plasti og öðrum spilliefnum finnst í afurðinni.
Til að bæta gráu ofan á svart þá fannst svo mygla í stöðinni þegar hún var rétt rúmlega árs gömul.
Kolbrún leggur til að valinn verði nýr stjórnarformaður Sorpu. Hún vill fá aðila í starfið sem hefur nauðsynlega sérmenntun eða þekkingu á málefnum og verkefnum Sorpu, haldgóða reynslu en umfram allt skilning á þessum málum. „Finna þarf aðila sem kann að hlusta á ráðleggingar annarra, varnarorð ef því er að skipta og beri gæfu til að sækja nauðsynlega þekkingu sem er fyrir hendi meðal annarra þjóða sem ýmist hafa verið farsælar í þessum málum eða hafa þurft að súpa seyði af mistökum,“ segir hún.
„Það er nefnilega hagkvæmara að læra af mistökum annarra en af ítrekuðum eigin mistökum. Hjá Sorpu hefur verið gerð röð mistaka sem koma nú illilega niður á borgarbúum. Vert er að skoða að Reykjavíkurborg stígi út úr samkeppnisrekstri sem þessum og bjóði hann þess í stað út. Ekki er að sjá að þessi rekstur gangi vel og íbúum Reykjavíkur hagkvæmur, undir stjórn b.s. kerfisins.“
Næsta dæmi sem Kolbrún nefnir er svokölluð stafræn sóun. Hún segist hafa í heilt ár staðið vaktina við að fylgjast með innleiðingu stafrænna lausna hjá borginni. „Enn er beðið eftir nauðsynlegum stafrænum lausnum en samt hafa milljarðar verið settir í ráðgjöf hjá erlendum fyrirtækjum, tilraunir og þróun á lausnum sem flest stór fyrirtæki og minni sveitarfélög eru jafnvel löngu komin með. Það er með öðrum orðum hamast við að finna upp hjólið og greitt rausnarlega fyrir með peningum Reykvíkinga,“ segir hún.
„Fjölda starfsmanna hefur verið sagt upp störfum og í staðinn hefur verkefnum verið útvistað eða aðrir starfsmenn ráðnir sem áður voru á einkamarkaði. Ekki hefur verið sýnt fram á hagkvæmni eða ávinning af þessum uppsögnum. Þróunar- og tilraunastarfsemi hefur verið í gangi eins og Borgin sé hugbúnaðarfyrirtæki á einkamarkaði sem æðir áfram á ævintýralegri vegferð, spreðandi fjármunum eigenda sinna á báðar hendur.“
Kolbrún veltir því þá fyrir sér hvar afurðirnar af þessari stafrænu lausnum eru. „Flokkur fólksins hefur beðið innri endurskoðun að fara ofan í kjölinn á þessu alvarlega máli,“ segir hún svo.
Undir lokin á pistlinum segir Kolbrún að þetta séu allt mál sem hægt er að taka á. „Lögð hefur verið fram tillaga um að fá ráðgjafa til að fara yfir rekstur helstu deilda til að kanna hvort að ekki megi hagræða en núverandi meirihluti hefur hafnað því. Tillagan var felld,“ segir hún.
Kolbrún segist vona eftir því að á næsta kjörtímabili verði meirihluti við stjórnvöllinn sem er tilbúinn að bretta upp ermar og taka til hendinni. Hún vill eyða biðlistum, tryggja börnum og unglingum næga fagþjónustu, taka á fátæktarvandanum og vinna í málefnum öryrkja og eldri borgara.
„Við í Flokki fólksins viljum auka jöfnuð, losa um höft og frelsisskerðingar og köllum eftir réttlæti fyrir alla samfélagshópa. Við viljum vinna hverfaskipulag með fólkinu og vinna í samgöngumálum með þarfir allra í huga hvernig svo sem þeir kjósa að fara um borgina,“ segir hún. „Til að ná fram endurbótum sem þjóna hagsmunum borgarbúa er frumskilyrði að borin sé virðing fyrir fjármunum þeirra, en þó fyrst og fremst virðing fyrir fólkinu sjálfu og þörfum þess.“
