Dómur í Rauðagerðismálinu sætir töluverðum tíðindum þar sem þrír af fjórum sakborningum voru sýknaðir. Angjelin Sterkaj var sakfelldur fyrir morðið á Armando Beqiri en meðákærðu voru sýknuð af hlutdeild í verknaðinum.
Angjelin var dæmdur í 16 ára fangelsi fyrir morði á Armando. Í samtali við lögmann Angjelins, Oddgeir Einarsson, kemur fram að Angjelin er sáttur við að hin þrjú hafi verið sýknuð en vill ekki láta hafa meira eftir sér í bili. Ekki liggur fyrir á þesar stundu hvort dómnum verður áfrýjað til Landsréttar af hans hálfu.
Í ákæru héraðssaksóknara er dregin upp mynd af samverknaði fólksins, þeirra Angjelin Sterkaj í 16 ára fangelsi, Sphetim Querimi, Murat Selivrada, Claudia Carvalho um morðið þar sem Shpetim sá um að aka Angjelin á vettvang, Claudia á að hafa fylgst með ferðum Armando og gefið Angjelin merki þegar Armando ók af stað frá Rauðarárstíg og áleiðis upp í Rauðagerði, og Murat á að hafa leiðbeint Claudiu varðandi þetta verkefni.
Það er niðurstaða dómarans að hvorki vitnisburður né gögn staðfesti að hin þrjú hafi vitað um þá fyrirætlun Angjelin að myrða Armando. Framburður Claudiu er sagður vera trúverðugur, eða eins og segir í dómnum:
„Engin vitni hafa borið um að ákærða X hafi framið þá háttsemi sem henni er gefin að sök. Það er mat dómsins að gögn málsins verði ekki virt þannig að hafna beri
trúverðugum framburði ákærðu X, og fær það stoð í framburði meðákærðu eins og rakið var, auk þess sem hluti annarra gagna málsins og upptökur úr
eftirlitsmyndavélum styðja niðurstöðuna í þessum ákærulið á líkan hátt og í 1. tölulið ákærunnar sem lýst var að framan. Ekkert bendir til þess, gegn neitun ákærðu X, að hún hafi vitað eða mátt vita að meðákærði Angjelin myndi svipta A lífi er hann fór til fundar við hann.“
Dómarinn telur einnig að ekki liggi fyrir sönnun um að þeir Sphetim og Murat hafi vitað um áform Angjelins. Framburður Sphetim, sem var í bílnum með Angjelin, varðandi þetta, er metinn trúverðugur. Murat neitaði því að hafa leiðbeint Claudiu um bíla Armandos og telur dómari ósannað að hann hafi gert það.
Sannað þykir að Angjelin hafi banað Armando enda liggur fyrir játning hans í málinu. Hins vegar var framburður Angjelin um að hann hafið framið morðið í nauðvörn vegna hótana Armandos og manna tengdum honum gegn sér og syni sínum, sem og að Armando hafi ráðist að sér á vettvangi er hann skaut hann, metinn ótrúverðugur. Hótanirnar tengdi Angjelin við meinta sekt sem á að hafa verið lögð á Anton Kristinn Þórarinsson í undirheimum. Um þetta segir í texta dómsins:
„Litlar upplýsingar eru um deilur milli ákærða Angjelins og A þótt gögn beri með sér að eitthvert ósætti kunni að hafa verið á milli þeirra. Framburður ákærða
Angjelins um miklar deilur og hótanir í sinn garð og að sekt hafi verið lögð á F, eins og rakið var, og ákærði hafi blandast inn í það, er að mati dómsins ótrúverðugur og ekki á rökum reistur.“
Auk 16 ára fangelsisdóms er Angjelin dæmdur til að greiða háar fjárhæðir í skaðabætur og málskotnað. Skipta þær fjárhæðir samanlagt tugum milljóna króna.
Meðfylgjandi eru myndir frá dómsuppkvaðningunni í Héraðsdómi Reykjavíkur í morgun. Myndirnar tók Anton Brink.
