Stórhættulegt athæfi einstaklings við eldgosið í Geldingadölum náðist á myndband. Í myndbandinu, sem tekið er af þyrluþjónustu Helo, má sjá manneskju standa efst uppi á gíg eldgossins, rétt hjá glóandi hrauninu.
Myndbandið virðist vera tekið upp í flygildi, þyrlu eða dróna. Manneskjan sést ganga ofan á toppi gígsins og ljóst er að ekki má mikið út af bregða svo þarna verði stórslys. Ekki er vitað hver manneskjan er.
Fréttablaðið fjallaði fyrst um málið og reyndi að kanna hvort manneskjan væri á vegum björgunarsveitar, lögreglu eða Veðurstofunnar. „Þetta er ekki björgunarsveitarmaður,“ segir Steinar Þór Kristinsson hjá Björgunarsveitinni.
„Nei, þetta er enginn á okkar vegum. Ég myndi vita það,“ sagði Úlfar Lúðvíksson, lögreglustjórinn á Suðurnesjum, í samtali við blaðamann Fréttablaðsins.
„Nei, það var enginn á vegum Veðurstofunnar í Geldingadölum í dag,“ sagði svo fulltrúi Veðurstofunnar.
Myndbandið má sjá hér fyrir neðan: