Lenya Rún Taha Karim, sem komst inn á þing fyrir Pírata en missti þingsæti sitt við endurtalningu atkvæða í Norðvesturkjördæmi, eftir nýafstaðnar alþingiskosningar, birti í gærkvöld á Twitter gífurlega hatursfull einkaskilaboð sem hún fékk frá manni einum.
Þetta kynþáttahatur hefur vakið mikla athygli á samfélagsmiðlum. Maðurinn sem virðist hafa sent skilaboðin er ekki í símaskrá og DV hefur ekki tekist að ná tali af honum í morgun. Ekkert á Facebook-síðu hans gefur í fyrstu sýn til kynna að hann aðhyllist kynþáttahatur.
Þess má geta að DV ræddi við Lenyu í byrjun september í kjölfar greinar sem hún birti um þann rasisma sem hún verður oft fyrir. Þar segir meðal annars:
„Lenya Rún Taha Karim er fædd og uppalin á Íslandi, hún gekk í Salaskóla, Menntaskólann við Sund og er núna í Háskóla Íslands. Lenya Rún, sem er fædd árið 1999, hefur sterka stöðu í samfélaginu miðað við aldur sinn, og er mjög félagslega virk. En hún verður fyrir rasisma vegna þess að hún er brún á hörund. Foreldrar hennar eru frá Kúrdistan en Lenya fæddist hér eftir að þau fluttust til Íslands.“
Miðað við ofangreind hatursskilaboð er ljóst að Lenyja hefur ekki ýkt í þessari grein sem hún birti, frekar dregið úr, en hún sagði í samtali við DV í áðurnefndri frétt:
„Mér finnst það vera frekar augljóst að það eru einhverjir samfélagslegir fordómar gegn útlendingum hér á Íslandi og mér fannst mikilvægt að skrifa þessa grein, ekki til að barma mér heldur til að minna á útlendinga á Íslandi. Þeir eru ómissandi. En miðað við hakakrossana og skilaboðin þá er ljóst að við þurfum að tala um hvernig við komum fram við útlendinga.“