Stjórn Heimilis og skóla, landssamtaka foreldra hefur ráðið Arnar Ævarsson í starf framkvæmdastjóra samtakanna. Hann tekur við starfinu af Hrefnu Sigurjónsdóttur sem gegnt hefur starfi framkvæmdastjóra síðastliðin tíu ár.
Arnar Ævarsson hefur víðtæka reynslu á vettvangi skóla-, frístunda- og forvarnarmála og hefur unnið á þeim vettvangi meira og minna frá árinu 1991. Síðastliðin ár hefur hann starfað við ráðgjöf og greiningar er varða umbætur í skólastarfi og komið að bæði innra og ytra mati grunnskóla nú síðast fyrir skóla- og frístundasvið Reykjavíkurborgar.
Arnar útskrifaðist úr kennslufræði (B.Ed ) frá Kennaraháskóla Íslands og lauk í framhaldi M.Sc í kennslufræði með áherslu á skilvirkni og stefnumótun frá Háskólanum í Groningen í Hollandi.. Hann er einnig með M.Sc í mannauðsstjórnun frá Háskóla Íslands.
Að sögn Sigrúnar Eddu Eðvarðsdóttur formanns Heimilis og skóla þá voru margir sem sýndu starfi framkvæmdastjóra áhuga en segja má að með ráðningu Arnars sé á vissan hátt brotið blað í sögu samtakanna þar sem hann er fyrsti karlmaðurinn til að gegna stöðu framkvæmdastjóra Heimilis og skóla í tæplega 29 ára sögu samtakanna.
