Eitthvað virðist lögreglan hafa haft að gera á kvöld og næturvakt því 64 mál enduðu á borði hennar í nótt.

Lögreglan hafði hendur í hári tveggja þjófa vegna þjófnaðar úr verslunum auk þess sem tilkynnt var um þjófnað á tösku á gistiheimili. Rúðubrot í tveim grunnskólum voru tilkynnt með 52 mínútna millibili en ekki kemur fram hvort gerendur hafi náðst.

Lögreglan sinnti svo aðstoðarbeiðni frá starfsmönnum verslunar vegna ölvaðs manns sem hafði lagt sig í verslun þeirra. Lögreglan vakti manninn sem gekk á brott.

Lausir hestar og reiðhjólaslys voru ennfremur á borði lögreglunnar á fjórðu stöð í gærkvöldi. Sá slasaði úr reiðhjólaslysinu var fluttur á sjúkrahús með sjúkrabíl.

Klukkan eitt í nótt stöðvaði lögreglu bifreið vegna gruns um fíkniefnaakstur. Reyndist sá grunur á rökum reistur og var bílstjórinn handtekinn. Fundust einnig fíkniefni í fórum hans auk þess sem einstaklingurinn var án ökuréttinda.

Ennfremur var eitthvað um hávaðaútköll um alla borg í gær.

Þetta kemur fram í dagbók lögreglu.