Veðurstofa hefur gefið út gula viðvörun fyrir landið allt á morgun. Samkvæmt vakthafandi veðurfræðing má búast við stormi víða um landið seint á morgun.
Hægt er að greina fjórar lægðir við Ísland og erfitt að fina út hver eða hverjar þeirra muni hafa mest áhrif á landið í dag.
Flugvélum hefur verið snúið frá Keflavík í kvöld vegna veðurs og er Icelandair búið að fella niður öll flug. Umferð hefur verið hæg vegna veðurs og sitja bílar fastir á Reykjanesbraut. Vegagerðin hefur því lokað veginum frá Þjóðbraut að Leifsstöð vegna ófærðar og bíla sem sitja fastir. Frá þessu er greint hjá vísi.is.
Samkvæmt Facebook síðu Lögreglustjórans á Suðurnesjum tóku einhverjir upp á því að yfirgefa bíla sína og ganga upp í flugstöð til að missa ekki af flugi. Mikil hætta mun hafa skapast af þessum einstaklingum. Lögregla hvetur fólk til að fara ekki út í veðrið nema vera til þess búin.
Vísir hefur eftir Davíð Má Bjarnasyni, upplýsingafulltrúa Landsbjargar, að björgunarsveitir Suðurnesja hafi verið kallaðar út og verður í forgangi hjá þeim að leysa úr flækjunni á Reykjanesbraut og koma fólki í skjól.
