TH Investments ehf. var úrskurðað gjaldþrota með úrskurði Héraðsdóms Reykjavíkur þann 11. desember síðastliðinn.

Félagið var nokkuð til umfjöllunar hjá DV árið 2011. Að baki félaginu stóðu bræðurnir Friðjón og Haraldur Þórðarsynir sem voru um skeið grunaðir um auðgunarbrot tengd gjaldeyrisviðskiptum. Félagið hagnaðist umtalsvert á tveimur mánuðum á árinu 2008, eða um 250 milljónir króna, og var talið að hagnaðurinn tengdist gjaldeyrisviðskiptum. Til samanburðar hagnaðist félagið aðeins um 45 milljónir allt árið 2009. Friðjón er fyrrverandi starfsmaður Landsbankans og starfaði einnig hjá fyrirtækinu Virðingu, en var rekinn þaðan arið 2008 vegna gruns um markaðsmisnotkun, peningaþvætti og auðgunarbrot. Friðjón var svo ráðinn til Gamma árið 2017.

Haraldur var forstöðumaður fjárstýringar Exista sem annaðist gjaldeyrisjöfnuð. Í dag er hann forstjóri Fossa markaða hf.

Lögmaður Friðjóns sagði í kjölfar umfjöllunar DV árið 2011 að líklega yrði farið fram á skaðabætur vegna málsins. Engum sögum fer þó af því að til slíkra bóta hafi komið.

„DV gekk mjög langt fram í ósmekklegum fullyrðingum í þessu máli,“ sagði Haraldur á þeim tíma í samtali við Fréttablaðið.

Engin starfsemi virðist hafa átt sér stað hjá TH Investments undanfarin ár. Ársreikningi var síðast skilað árið 2014 og hafði félagið þá verið rekið með tapi síðan árið 2009.