Maður um þrítugt er grunaður um að hafa orðið móður sinni að bana í Hafnarfirði í nótt. Þetta kemur fram í kvöldfréttum RÚV í kvöld.
Kona um sextugt fannst látin í heimahúsi í Hafnarfirði í nótt, samkvæmt tilkynningu frá lögreglu. Tilkynning um málið barst um klukkan hálf tvö í nótt og fór lögregla þegar á vettvang en konan var látin þegar að var komið. Tveir karlmenn, annar um þrítugt og hinn á sextugsaldri, voru á heimilinu og voru báðir handteknir í þágu rannsóknarinnar.
Nú liggur fyrir að yngri maðurinn, sá þrítugi, sem er sonur konunnar, er grunaður um að hafa orðið henni að bana. Ekki er ljóst hvort eldri maðurinn er talinn hafa komið við sögu.
Þá er maður um sextugt í haldi lögreglu á Suðurnesjum, grunaður um að hafa banað sambýliskonu sinni, fyrir rúmri viku. Maðurinn var handtekinn eftir að krufningarskýrsla í málinu lá fyrir.