Söngvarinn og rappkrúttið Drake hefur undanfarið verið að vinna að næstu plötu sinni en þessi fjórfaldi Grammy-verðlaunahafi tók sér góða pásu til að njóta lífsins á Barbados þar sem hann buslar og ærslast með vinum sínum.
Drake hefur augljóslega látið að sér kveða í ræktinni og státar af grjóthörðum líkama sem honum leiðist ekkert að sýna og það er alveg ljóst að hann hefur nýtt Covid-einangrunina vel í líkamsrækt. Hann sprangar um ber að ofan og sýnir meitlaða vöðvana ásamt vænu safni húðflúra sem hann hefur sankað að sér í gegnum tíðina. Svo enginn missi af nýja og flotta forminu deildi hann nýverið mynd af magavöðvunum með fylgjendum sínum á samfélagsmiðlum undir fyrirsögninni „Sunny day in Saint James,“ þar sem það fer ekki á milli mála að hann hefur ekki bætt á sig einu einasta grammi í sóttkví.
Barbados eru náttúrulega heimaland fyrrverandi kærustu hans, söngdívunnar Rihönnu, og þegar hann birti mynd af sér með bróður hennar Rorrey urðu aðdáendur hans að vonum gríðarlega forvitnir. Það er hins vegar ekkert sem bendir til þess að þau séu að taka saman aftur og Drake virðist hæstánægður með fríið sitt umvafinn vinum, sandi og sól.
