Benedikt Bóas Hinriksson, blaðamaður á Morgunblaðinu, þykir lítið koma til sjónvarpsþáttaraðarinnar Ófærð ef marka má viðhorfspistil sem birtur er í blaðinu í dag. Segir Benedikt að handritshöfundar hafi verið með allt niðrum sig og leikararnir staðið sig eftir bestu getu að halda „illa skrifuðum“ þáttum á lofti.

„Þetta er allt of mikið Hollywood, eitthvað svo fjarri raunveruleikanum. Skandinavísku sjónvarpsseríurnar hafa einmitt náð vinsældum fyrir að vera svolítið í takti við raunveruleikanna. En það er eins og Ófærð sé skrifuð fyrir bandarískt sjónvarp. Handritshöfundar hafa verið með allt niður um sig frá upphafi,“ segir Benedikt sem telur upp nokkur atriði sem honum finnst óraunveruleg. Þeim sem ekki hafa séð þættina en ætla að gera það er ráðlagt að lesa ekki lengra.

„Í veruleikanum þarf skip í íslenskri hafnsögu ekki neinn dómsúrskurð til að vera kyrrsett. Lögreglumaðurinn hefði aldrei tapað slagnum við hinn grunaða eins og hann var myndaður, lík hefði aldrei verið látið vera óvaktað í frystigeymslu, tæknideildin hefði alltaf komist á staðinn og það er eins og fjölmiðlar séu ekki til í huga handritshöfunda. Það er alltaf gaman að horfa á íslenskt efni en Ófærð lyktar af áhugamennsku,“ segir Benedikt.