„Hún er náttúrulega stóra ástin í lífi mínu. Ég hef oft hugsað hvort hún hafi verið send inn á réttum tíma,“ segir Ragnar Bjarnason um eiginkonu sína, Helle Birthe. Hún gekk inn á veitingahús með vinkonu sinni þar sem hljómsveit Ragga var að spila.
„Ég sé hana, og bara, hvort ég hætti að spila eða beið í hálftíma eftir pásu. En ég labbaði til hennar og sagði bara við hana: Heyrðu elskan, ég ætla bara að giftast þér,“ segir Raggi.
Raggi er frægur fyrir að muna ekki lagatexta og er gert góðlátlegt grín að því í þáttunum sem öðru með þessum ástsæla söngvara íslendinga.
Raggi er einn fjögurra tónlistarmanna sem sýna á sér nýja hlið í annarri þáttaröð Trúnó, sem snýr aftur í Sjónvarpi Símans Premium 21. desember. Aðrir viðmælendur eru Gunnar Þórðarson, Högni Egilsson og Mugison.
Þeir segja okkur frá hlutum og viðburðum í þeirra lífi sem hafa mótað listsköpun þeirra í tónlist með einlægum hætti, segja frá hlutum sem þeir hafa ekki talað um áður.
„Þetta eru draumaviðmælendur sem ég fékk í báðum seríunum. Tónlistin þeirra er svo stór hluti af lífi okkar allra. Mig langaði að hafa þættina í eldhúsinu heima hjá þeim og komast að kjarnanum um lífið og listina,“ segir Anna Hildur.
Allir fjórir þættirnir verða aðgengilegir í Sjónvarpi Símans Premium 21. desember en þeir eru framleiddir af Tattarrattat fyrir Símann. Hugmynd og handrit þáttanna á Anna Hildur Hildibrandsdóttir, en leikstjóri og tökumaður er Margrét Seema Takyar.
