Hin sænska Larsson á leið til Íslands
Sænska söngkonan Zara Larsson mun halda tónleika í Laugardalshöll í október næstkomandi og af því tilefni var leitað að tvífara hennar á Íslandi. Eftir Facebook-leik er hann fundinn: Anna Lísa Hallsdóttir, 13 ára nemi í Varmárskóla.
„Mamma „taggaði“ mig í leikinn í gríni,“ segir Anna Lísa, ánægð með að hafa verið valin þrátt fyrir að vera ekki gallharður aðdáandi Zöru Larsson. „Ég er ekki mikill aðdáandi, en veit auðvitað hver hún er, hef hlustað á lögin hennar og er að fara á tónleikana.“
Í lok maí var auglýst eftir tvífara Zöru Larsson á Íslandi í færslu á Facebook-síðu Senu og bauðst fólki að merkja þá stúlku í skilaboðum sem því þótti líkjast Larsson. Stúlkunum sem tilnefndar voru var boðið í lazertag og pítsuveislu í Skemmtigarðinum í Grafarvogi. Í kjölfarið kom myndband af þeim öllum og mynd af hverri og einni. Síðan tók við kosning á Facebook um hver þeirra væri líkust Larsson og stóð Anna Lísa Hallsdóttir uppi sem sigurvegari.
„Það var tekið upp myndband af okkur í Skemmtigarðinum, síðan fengum við allar númer og fólk gat síðan valið á Facebook hver okkar væri líkust Zöru,“ segir Anna Lísa. „Ég fór síðan í „make-over“ fyrir viku og Ásgeir sá um að greiða mér, farða og velja fötin. Þetta var bara skemmtilegt og vinkonunum líst vel á þetta.“ Það var Ásgeir Hjartarson hárgreiðslumeistari sem sá um að greiða, farða og velja fötin á Önnu Lísu. Hann er eigandi Hairbrush ásamt konu sinni, Bergþóru Þórsdóttur förðunarfræðingi, auk þess sem þau reka MASK – Makeup & Airbrush Academy.
Þetta er þó ekki frumraun Önnu Lísu fyrir framan myndavélarnar, því hún hefur verið fyrirsæta í hárbók. Með skólanum er Anna Lísa í dansi. Faðir hennar, Hallur Már, starfar á Mbl.is og afi hennar er einn kunnasti fjölmiðlamaður landsins, Hallur Hallsson. Aðspurð hvort hún sé búin að ákveða hvað hún ætlar að vinna við í framtíðinni og hvort að hún muni jafnvel feta í fótspor föður síns og afa segist hún ekki viss. Enda nægur tími til að ákveða það fyrir unga stúlku.
Sænska söngkonan og lagahöfundurinn Zara Maria Larsson er fædd 16. desember 1997 í Stokkhólmi. Hún vakti fyrst athygli á tónlistarsviðinu þegar hún vann hæfileikakeppnina Talang 2008, þá tíu ára gömul. Hún fékk seinna inngöngu í Adolf Fredrik’s tónlistarskólann, en hafnaði því boði þar sem hún ætlaði að eigin sögn ekki að syngja í kór. Yngri systir hennar, Hanna, er einnig söngkona og meðlimur í hljómsveitinni Hanna & Andrea.
Larsson hefur gefið út tvær plötur. Sú fyrri „Introducing“ kom út í janúar 2013 og fór lagið „Uncover“ í fyrsta sæti vinsældalista í Svíþjóð, Danmörku og Noregi. Í júlí sama ár var platan orðin þreföld platínuplata í Svíþjóð. Á plötunni „So Good“, sem kom út í mars á þessu ári, vinnur hún með listamönnum á borð við Ed Sheeran, Clean Bandit og Ty Dolla $ign.
Larsson kom fram bæði á setningar- og lokaathöfn Evrópumeistarakeppninnar í fótbolta 2016 og söng hún í lagi David Guetta „This One’s For You“ sem var opinbert lag keppninnar. Zara var tilnefnd í ár til tvennra BRIT-verðlauna og NME-verðlauna sem „besti nýi listamaðurinn.“ Þrjú ár í röð, 2015–2017, hefur hún verið tilnefnd til verðlauna á Grammis, sem eru hin sænsku Grammy-verðlaun, og í ár var hún valin listamaður ársins. Hún er einnig komin á lista Time Magazine yfir 30 áhrifamestu táninga heims. Mörg laga hennar eru með nokkur hundruð milljón spilanir á Spotify og Youtube og má þar nefna lögin „So Good“, „Lush Life“, „Symphony“ og „Never Forget You“, en myndbandið við síðastnefnda lagið er tekið upp á Íslandi.
