Fyrrum hertogaynjan Sarah Ferguson mun nú ætla sér að skrifa ævisögu sína, ef marka má frétt Examiner sem hefur þetta eftir ónefndum heimildarmanni. Ferguson hefur fallið í ónáð í heimalandinu út af tengslum hennar við níðinginn Jeffrey Epstein, en fyrir vikið voru hún og fyrrum maður hennar, Andrew Mountbatten Windor, svipt titlum sínum.

Að sögn heimildarmanns hefur Ferguson nú áhyggjur af fjárhag sínum, eins finnst henni fréttaflutningur einkennast af rangfærslum og vill freista þess að rétta sinn hlut.

„Hún er enn að vonast til að klóra sig í gegnum þetta hneyksli og ná einhvern veginn að bjarga orðspori sínu.“

Upphaflega mun fyrrum hertogaynjan hafa ætlað sér að skrifa bókina með fyrrverandi eiginmanni sínum en hefur nú afráðið að ráðast í verkið ein. Þó er talið að Ferguson muni hlífa Andrew í bókinni enda mun hún óttast hefndaraðgerðir frá honum. Hún ætli sér engu að síður að fjalla um hjónaband þeirra, hvernig það sigldi í strand og hvernig fyrrum prinsinn var henni ítrekað ótrúr.

Ferguson mun eins ætla sér að opinbera ljót leyndarmál um konungsfjölskylduna, þá einkum Karl Bretakonung, Camillu drottningu, Vilhjálm Bretaprins og eiginkonu hans Katrínu prinsessu. Ólíkt Andrew muni hún engu halda undan hvað fyrrum tengdafjölskyldu sína varðar sem eigi ekki von á góðu.