Ásmundur Friðriksson, þingmaður Sjálfstæðisflokksins, lenti í talsverðri brælu þegar hann var á leið frá Vestmanneyjum til fastalandsins á fimmtudag. „Það er skítabræla milli lands og Eyja en lending í Landeyjahöfn ótrúlega mjúk og góð. Mikil sjóveiki var um borð í Baldri á leiðinni sem tók klukkutíma í stað 35 mín,“ sagði Ásmundur í færslu á Facebook sem endaði á þessum orðum: „En allir komu þeir aftur og enginn þeirra dó.“

Ásmundur ætti að vera flestu vanur þegar sjómennska er annars vegar enda stundaði hann hana sem ungur maður. Þá starfaði hann sem verkstjóri hjá Vinnslustöð Vestmannaeyja og sjálfstætt í fiskvinnslu um margra ára skeið áður en hann var kjörinn á þing.