„Það mátti engu muna að ég ældi af þessu píputóbaki sem ég þurfti að reykja,“ segir útvarpsmaðurinn Ívar Guðmundsson, um upplifun sína af því að leika í grínþættinum Steypustöðinni. Í þætti helgarinnar var atriði í þremur hlutum um Bylgjulestina. Þjóðþekktir útvarpsmenn, svo sem Ívar sjálfur, Heimir Karlsson, Sigurður Hlöðversson og Þorgeir Ástvaldsson, léku í atriði þar sem heppinn hlustandi Bylgjunnar fékk að fara í ferðalag með Bylgjulestinni, ásamt ungum syni sínum.

Ferðin var svolítið öðruvísi en feðgarnir höfðu gert sér í hugarlund, svo vægt sé til orða tekið. Um var að ræða sannkallaða svallferð þar sem hálfnaktar konur og fíkniefni voru í aðalhlutverki. Ferðinni var heitið til Hellu.

„Það er eitt sem þú þarft að vita um Bylgjuna,“ sagði Þorgeir Ástvalds við pabbann og bætti við: „Það eru allir kannski að hlusta en enginn er að horfa.“ Að svo búnu þvingaði hann pabbann til að taka kókaín.

Ívar hafði ekki séð atriðið í heild fyrr en það var sýnt á Stöð 2 um helgina. Hann segir að það sé gott að fara vel út fyrir þægindarammann endrum og eins en viðurkennir að hann hafi átt mjög erfitt með að horfa á atriðið, sem tekið var upp kvöld eitt í nóvember. Hann sé þó hæstánægður með útkomuna.

Þeir félagarnir á Bylgjunni þurftu að sögn Ívars smá tíma til að sannfærast um að láta slag standa. „Við þurftum að ræða þetta og gera þetta upp við okkur. Svo ákváðum við bara að fara alla leið – gera þetta almennilega.“

Við upphaf ferðarinnar rétti Heimir Karls feðgunum ferðapakka sem innihélt hvorki blöðrur né gos. „Hvað er í pakkanum?“ spurði Steindi í gervi pabbans. „Smokkar, kamagra, treo, einn líter af landa, Winston í hörðum og hnúajárn,“ svaraði Heimir kaldur en óhætt er að segja að þeir Bylgjumenn hafi farið á kostum.

Kýlir í fötu Ívar segist hafa lært ýmis nýyrði við tökur á sketsinum.

Ívar gengst ekki við því að atriðið dragi upp raunsanna mynd af dæmigerðri ferð Bylgjulestarinnar. „Ég man aldrei eftir þessu á mínum 20 árum í Bylgjulestinni,“ segir hann hlæjandi. Hann segir að forstjóri fyrirtækisins hafi lagt blessun sína yfir atriðið áður en það fór í loftið, enda sé það mjög djarft. „Þetta var dálítið erfitt. Þorgeir sagði mér til dæmis að hann hefði reynt að halda barnabörnunum frá sjónvarpinu þegar þátturinn var sýndur. En fólk sér sem betur fer grínið í þessu.“

Ívar sést í myndbandinu „kýla í fötu“ en Ívar uppljóstrar að um píputóbak hafi verið að ræða. Eftir nokkrar tökur hafi hann, sem að eigin sögn hefur aldrei verið reykingamaður, fundið verulega fyrir tóbakinu. Hann hafi verið hársbreidd frá því að stíga út úr bílnum og kasta upp. „Það mátti litlu muna,“ segir hann glaður í bragði.