Steven Spielberg vinnur að nýrri kvikmynd og þar munu Tom Hanks og Meryl Streep sjást saman í fyrsta sinn á hvita tjaldinu. Myndin nefnist The Papers og er gerð eftir ævisögu Katharine Graham, eiganda Washington Post. Sú bók nefnist Personal History og hlaut á sínum tíma Pulitzer-verðlaunin.

Meryl Streep leikur Graham og Hanks fer með hlutverk ritstjóra Washington Post, Ben Bradlee. Graham lést árið 2001 af völdum höfuðáverka, 84 ára gömul. Bradley lést árið 2014, 93 ára gamall. Leikarinn Jason Robards lék hann í hinni frægu mynd All the President’s Men og hlaut verðskulduð Óskarsverðlaun fyrir leik sinn.

Fróðlegt verður að sjá hvernig Hanks mun takast upp en hann er tvöfaldur Óskarsverðlaunahafi. Streep, sem hefur þrisvar sinnum unnið til Óskarsverðlauna, leikur nú í fyrsta sinn í mynd sem Spielberg leikstýrir, en þetta er í fimmta sinn sem Hanks vinnur með leikstjóranum. Spielberg hefur einnig fengið til liðs við sig eftirlætis tónskáld sitt, John Williams, en þetta er í tuttugasta og áttunda sinn sem þeir vinna saman.

Í myndinni er sjónum beint að Pentagon skjölunum svonefndu um afskipti Bandaríkjamanna af Víetnam, en Washington Post birtu þau árið 1971. Myndin verður frumsýnd í lok árs.