Steindi Jr. lofaði því að hlaupa 21 kílómetra í Reykjavíkurmaraþoninu í útvarpsþættinum Sumarmorgnum á Rás 2 eftir áskorun þáttarstjórnandans Sóla Hólm. Hann lýsti jafnframt eftir góðu málefni til að styrkja í hlaupinu.

Steindi sagðist hafa verið grannur unglingur en haft aðeins þurft að berjast við aukakílóin eftir að hann varð eldri. Í skemmtiferð í Búlgaríu keypti hann fæðubótarefni sem nefnist American Weight Gainer 40.000 en kunni ekki alveg að nota það. Hann æfði lítið en borðaði fæðubótarefnið samhliða öðrum mat og bætti á sig um það bil 8 kílóum að eigin sögn. „Þetta var byrjunin á fitubolluævintýrinu.“

Bumbubolti og KFC

Steindi sagðist alltaf hafa verið á leið í ræktina en ekki gert nógu mikið í því. Ekki hjálpaði til að veitingastaðurinn KFC var í næsta nágrenni við heimili hans. Hann stundar þó svokallaðan bumbubolta einu sinni í viku og segist hafa fínt úthald.

Í vetur þurfti hann að missa um það bil 10 kíló fyrir kvikmyndina Undir trénu sem frumsýnd verður 1. september næstkomandi. Þá borðaði hann lítið og þurfti að taka verkjalyf. Hann mælir því ekki með því að skera sig svona mikið niður á svo stuttum tíma. Jafnframt segir hann að kíóin séu komin á hann aftur.

Þáttarstjórnendurnir þurftu að tala Steinda svolítið til og Steindi sagðist ekki alveg átta sig á vegalengdinni. Hann hefur þó nægan tíma til þess að æfa vel fyrir maraþonið sem fram fer þann 19. ágúst næstkomandi.

DV hvetur lesendur til að benda Steina á gott málefni í athugasemdakerfinu hér að neðan.