„Samkvæmt þessari greiningu sem ég er með þá eru meiri líkur en minni á því að ég fái þetta aftur og það dragi mig dauða,“ segir Stefán Karl Stefánsson sem greindist með illvígt krabbamein í fyrra og gekkst í kjölfarið undir stífa lyfja og geislameðferð. Hann þarf að lifa með þeim möguleika að sjúkdómurinn muni taka sig upp á ný en neitar að bugast.

„Það hljómar rosalega: „Guð minn góður, þetta er svona hræðilega alvarlegt. Ég get líka farið og leikið mér að allskonar tölum um líkur á því að verða fyrir strætó hérna úti og eitthvað svona,“ segir Stefán í viðtali við sjónvarpsþáttinn Ný sýn en þættirnir eru sýndir í Sjónvarpi Símans.

„Þessi lífsbreyting varð þegar að Kristín Huld Haraldsdóttir læknir labbar inn í herbergi á Landspítalanum þar sem ég ligg og Steina situr við hliðina á mér. Segir að það sé hugsanlega æxli, sem er þarna í gallveginum. Lýsir þessu fyrir okkur og svona, horfir síðan á okkur og við spyrjum spurninga á fullu: „Er er þetta svona, er þetta krabbamein?“ – „Við höldum að það sé það,“ segir Stefán Karl þvínæst og kveðst á þeirri stundu hafa gert sér grein fyrir hver staðan væri.

„Þá vissi ég : það er verið að segja mér með öðrum orðum: „Þú ert kominn með krabbamein Stefán. Og ég algjörlega bara brotnaði saman. Hún var varla löbbuð út um dyrnar þegar ég setti sængina upp fyrir haus og vildi bara hverfa.“
Á öðrum stað í þættinum segir Stefán: „Ég hugsaði með mér strax: „Takið mig bara núna, ekki láta mig kveljast, takið mig þá frekar núna.“ Þá segir hann hugarfarið skipta gríðarlega miklu máli í þessum aðstæðum.

„Þetta er svo mikið hérna uppi,“ segir Stefán og bendir á höfuðið á sér. „Og þess vegna skiptir hugarfarið öllu máli.“

[youtube https://www.youtube.com/watch?v=JiMn342Of_s&w=600&h=360]