Hinn atorkusami bóndi, Heiða Guðný Ásgeirsdóttir frá Ljótarstöðum í Skaftártungu, vakti verulega athygli á Heimsmeistaramótinu í sauðfjárrúningi sem haldið var í Invercargill í Nýja-Sjálandi á dögunum.

Í grein á heimasíðu mótsins var fjallað um þátttöku hennar en þar var hún sögð heita Heoia Guony, sem er kannski ekki alveg nærri lagi. Vakti sérstaklega athygli að Heiða Guðný hafði komið alla leið frá Íslandi til þess að taka þátt og ekki síður að hún var eina konan sem spreytti sig í þessum aðalflokki mótsins.

Í greininni var farið stuttlega yfir feril Heiðu Guðnýjar og hvernig að hún hafi tekið við búi föður síns aðeins 23 ára gömul. Þá var hún spurð afhverju að hún hafi tekið þátt í mótinu og því svaraði Heiða Guðný á þessa leið: „Ég var nógu klikkuð til að skella mér. Ég elska að rýja“

Í fréttinni kemur fram að aðstæður á Nýja Sjálandi séu gerólíkar því sem þekkjast á Íslandi og því hafi Heiða Guðný þurft að læra allt aðra tækni en hún var vön. Hún hafi sótt námskeið sem mótshaldarar héldu fyrir heimsmeistaramótið og kemur fram í greininni að þarf hafi hún lært meira á nokkrum dögum en síðustu fimm ár sem hún hefur rúið.
Heiða endaði í 52.sæti í mótinu af 54 skráðum keppendum og komst ekki áfram í úrslit í þetta skiptið.

Þetta er ekki í fyrsta skipti sem Heiða Guðný tekur þátt í HM í rúningi en frá því var greint í helgarviðtali DV í ágúst 2015 þar sem ræddi hún um lífið í sveitinni, fyrirsætuferilinn, átakanlega systurmissi og ýmislegt fleira. Þar deildi Heiða Guðný óslökkvandi ævintýraþrá sinni sem hefði einmitt orðið til þess að hún skellti sér á HM í rúningi sem þá var haldin í Bretlandi. Ég vil halda því á lofti að konur geti líka klippt,“ sagði Heiða Guðný og sýndi það heldur betur í verki með því að ferðast alla leið til Nýja Sjálands til að keppa.

Þá sagði Heiða Guðný: „Helsti tilgangurinn með því að fara út er að koma með reynsluna heim og auka kennsluna hérna heima. Og leggja meiri áherslu á að rýja vel. Kennslan á Hvanneyri er góðra gjalda verð en það er nauðsynlegt að auka hana. Ég væri sjálf mjög til í að ná þeirri færni að geta kennt öðrum, og halda jafnvel rúningsnámskeið fyrir konur. Þær eru svolítið til baka í þessari grein. Hika við að fara út í þetta.“