Arnold Schwarzenegger er afar virkur á Snapchat. Síðasta sólarhring hefur Arnold svarað spurningum frá aðdáendum héðan og þaðan í heiminum. Þegar Hollywood-stjarnan birti loks svörin var það ungur íslenskur piltur sem bar upp fyrstu spurninguna.

Sveinn Hjörtur Guðfinnsson birti myndskeið á Facebook af piltinum að varpa fram spurningu um hvað færi í heilsudrykk stjörnunnar. Pilturinn byrjaði á því að heilsa og bar kveðju til hans frá Íslandi. Næst spurði piltur hvað fari í heilsudrykkinn.

Arnold sem var í æfingasalnum á miðri æfingu þegar hann svaraði og sagði að það sem hann fengi sér helst fyrir æfingar væri drykkur sem innihéldi mjólkurduft, egg og vatn. Sveinn Hjörtur sem birti eins og áður segir myndskeiðið segir um piltinn unga:

„Það væri áhugavert að prófa þessa Íslandsblöndu frá Arnold sem er gríðarlega vinsæll og skemmtilegur í alla staði, enda lífsgildi hans að gefast aldrei, gefa af sjálfum sér, og berjast! Ég veit ekki hver pilturinn er, en fagna framtaki hans og vinsamlegu viðmóti. Ungi maður, þú ert þjóð okkar til sóma!“