„Krakkarnir í skólanum áttuðu sig ekki hvað þeir voru að gera en þeir gátu verið mjög rætnir og leiðinlegir. Auk kækjanna var ég gjarnan með mikinn varaþurrk og því eldrauður í kringum munninn og var kallaður Varamaðurinn,“ segir tónlistarmaðurinn Rúnar Freyr Rúnarsson, betur þekktur undir nafninu Rúnar Eff en hann var greindur með Tourette heilkennið í æsku og mátti þess vegna þola stríðni af hálfu skólafélaga sinna. Hann þurfti í kjölfarið að skipta um skóla. Hann ræðir meðal annars um líf sitt með heilkenninu í viðtali sem birtist í nýjasta tölublaði Akureyri Vikublaðs.
Rúnar segir heilkennið hafa haft mikið áhrif á æsku hans en einkennin lýstu sér meðal annars þannig að Rúnar hristi hausinn í sífellu, ræskti sig, skellti saman tönnum og smellti fingrum. Þá fylgdu með þráhyggja og athyglisbrestur en Rúnar segir einkennin hafa minnkað mikið, og í dag verði þeirra helst vart þegar hann er undir miklu álagi.
„Oft geri ég eitthvað án þess að gera mér grein fyrir því en veit að ég hef til dæmis verið að smella fingrum vegna þreytu í fingrunum. Eins ef fólk í kringum mig er farið að hlæja veit ég að ég hef verið eitthvað skrítinn. Þegar ég er slæmur finnst mér þetta eins og þráhyggja; ég bara verð að gera þetta. Ég get kannski haldið aftur af mér í stuttan tíma en fæ það svo þrefalt í bakið á mér.“
Hann segir það jafnframt hafa verið létti þegar hann fékk Tourette greininguna á sínum yngri árum; þar með hafði hann afsökun fyrir kækjunum og gat sagt fólki að kækirnir væru tilkomnir vegna sjúkdóms. Hann segir álag og stress hafa minnkað mikið eftir að han skipti um skóla- og þar með minnkuðu kækirnir,“
segir Rúnar en sonur hans er einnig greindur með heilkennið. Hans einkenni eru þó ekki jafn slæm og þau sem Rúnar hafði og segir Rúnar son sinn hafa sloppið við stríðni af hálfu skólafélaganna.
„Ég hafði samviskubit því hann erfði þetta frá mér og ég hafði áhyggjur af því að hann myndi ganga í gegnum það sama og ég; stríðni og leiðindi. Sem betur fer hafa þær áhyggjur reynst ástæðulausar.“
