Lorraine, sem er 36 ára og starfar einnig sem leikkona, birti mynd af föður sínum á Instagram þar sem hann fagnaði afmælinu í faðmi fjölskyldu og vina, en meðal gesta var kanadíska söngkonan Joni Mitchell sem er orðin 82 ára.
Á myndinni sést Nicholson brosa sínu einkennandi brosi á meðan hann klappar í takt við tónlist ásamt Mitchell og öðrum viðstöddum.
Samhliða birti hún einnig eldri mynd af föður sínum frá áttunda áratugnum, þar sem hann klæðist rauðum Coca-Cola bol og reykir vindil – mynd sem hefur vakið athygli aðdáenda.
Jack hefur ekki látið mikið fyrir sér fara í Hollywood á síðustu árum og að mestu haldið sig utan sviðsljóssins. Síðasta kvikmyndahlutverk hans var í rómantísku gamanmyndinni How Do You Know árið 2010.
Lorraine hefur þó af og til deilt myndum af föður sínum. Í desember 2025 birti hún mynd af honum ásamt sér og bróður sínum Ray á veitingastað, sem var þá fyrsta myndin sem birtist af leikaranum í nærri ár.
Samkvæmt heimildum bandarískra fjölmiðla líður Nicholson vel og nýtur þess að vera fjarri Hollywood. „Hann er hamingjusamur og nýtur þess að eyða tíma með fjölskyldunni,“ sagði heimildarmaður á sínum tíma og bætti við að hann væri mjög náinn börnum sínum.
Leikarinn hefur aðeins látið sjá sig opinberlega við örfá tækifæri á undanförnum árum. Hann sást meðal annars í áhorfendasalnum þegar Saturday Night Live-gamanþættirnir fögnuðu 50 ára afmæli sínu í fyrra.
Vinur hans til margra ára, leikarinn Danny DeVito, sagði í viðtali á síðasta ári að Nicholson væri við góða heilsu. „Ég hitti Jack fyrir nokkrum vikum og hann er í frábæru formi,“ sagði DeVito og virðist myndin af leikaranum staðfesta það.
Jack Nicholson er einn þekktasti leikari Bandaríkjanna en hann vann sín fyrstu Óskarsverðlaun fyrir aðalhlutverkið í myndinni One Flew Over The Cuckoo’s Nest. Þá vann hann Óskarinn fyrir aukahlutverk í myndinni Terms of Endearment og svo fyrir aðalhlutverkið í myndinni As Good as it Gets. Þá á hann að baki eftirminnileg hlutverk í myndum eins og The Shining.
