Jóhann Páll Jóhannsson er nýr umhverfis-, orku- og loftlagsráðherra en áður en hann settist á þing fyrir Samfylkinguna árið 2021 hafði hann getið sér gott orð sem blaðamaður, fyrst á DV og svo á Stundinni. Hann mætti í Vikuna með Gísla Marteini í gærkvöldi og minnti þar landsmenn á að áður en hann gerðist verðlaunablaðamaður var hann barnastjarna.

Þegar Jóhann Páll var 12 ára samdi hann lag sem sló í gegn á Netinu og í útvarpi. Þar biðlaði Jóhann til hlustenda með söng að hjálpa sér að finna glaðværa vin sinn Guðmund.

„Það er aðeins óvænt að það er önnur barnastjarna í sófanum,“ sagði Gísli Marteinn í þættinum í gær eftir að tónlistarkonan Elín Hall hafði flutt lagið Í kvöld í sófanum. „Ég held við þurfum að fá að sjá mynd af YouTube.“

Jóhann Páll rak upp stór augu þegar Gísli afhjúpaði fortíð hans sem barnastjarna og birti mynd af honum, 12 ára með gítarinn.

„Var þetta upphaf og endir tónlistarferilsins?“ spurði Gísli. „Já,“ svaraði Jóhann Páll raunamæddur og tók fram að hann væri svokallað eins-slagara-undur. Jóhann segir að viðlagið eftirminnilega hafi orðið til þegar hann og félagarnir voru heima hjá Halldóri Eldjárn. Halldór lagði til að þeir myndu söngla lag sem ætti að heita Hvar er Guðmundur. „Svo í einhverri hvatvísi var þetta gefið út og sett á rokk.is. Vinsælasta lag rokk.is frá upphafi sko.“

Svo benti Gísli Jóhanni á að það væri nú gítar við hlið hans. „Ég veit alveg hvað þú ert að fara biðja mig um,“ sagði Jóhann sem var fljótur að kveikja á perunni og áhorfendur fögnuðu í sal.