Brot úr þættinum má horfa á hér að neðan en smelltu hér til að horfa á hann í heild sinni.
Hlustaðu á þáttinn á Spotify, Apple Podcasts eða hlaðvarpsþjónustu Google.
Katrín Myrra gaf út fyrsta lagið sitt, „Lies“, árið 2020 en það tók hana langan tíma að þora að taka fyrsta skrefið. „Þegar ég var yngri var þetta hundrað prósent eitthvað sem mig langaði að gera en ég fékk smá að heyra að þetta yrði ógeðslega erfitt og ekki endilega raunhæft. Þannig ég hélt að ég myndi aldrei gera þetta,“ segir Katrín Myrra, sem naut þess að syngja og prófa sig áfram í leiklist á barnsaldri.
„En síðan hugsaði ég bara: „Fokk it, af hverju ekki?“ Þegar ég var í kringum tvítugt. Ég vissi ekki alveg hvar ég átti að byrja en hafði samband við pródúser og við létum vaða.“
Katrín Myrra skrifar mjög persónulega lagatexta sem byggja á hennar upplifunum og reynslu. Hún segir að til að byrja með hafi það verið stressandi að gefa út lögin en nú sé sagan önnur.
„Í dag líður mér eins og ég sé búin að sleppa tökunum á því hvað fólki finnst um það sem ég er að syngja um. En auðvitað er smá spenna í kringum það, en ég er ekki jafn stressuð yfir því. Textar eru eitthvað sem kom mér út í tónlist. Ég var mikið að skrifa ljóð þegar ég var yngri en ég hélt aldrei að ég myndi gera eitthvað með það. Síðan byrjuðu textarnir að verða persónulegri,“ segir hún.
Prófaðu að endurhlaða síðuna ef þú sérð ekki færsluna hér að neðan.
View this post on Instagram
Aðspurð hvort það sé erfiðara fyrir konur að brjótast inn í tónlistarbransann segir Katrín Myrra:
„Þetta er mjög karllægur bransi og hefur alltaf verið. Ef maður horfir á það sem rannsóknir sýna, þá eru konur mjög mikið undir sem pródúser. Núna eru konur byrjaðar að koma mikið meira fram, sem mér finnst geggjað. En maður þarf alveg að taka pláss.
Það vinna fleiri karlmenn í þessum bransa og þá er kannski auðveldra fyrir þá að vera með tengingu inn í bransann. Þeir eru félagar og þekkja hinn og þennan og það er kannski erfiðara fyrir konur því þær eru ekki með jafn mikil sambönd.“
Katrín Myrra segir að þetta snúist ekki um að taka sviðsljósið frá karlkyns flytjendum heldur að stækka sviðið svo fleiri konur komist að.
„Allir þessir tónlistarmenn sem eru í dag út um allt eru geggjaðir tónlistarmenn og eiga allir að vera í sviðsljósinu, hundrað prósent, en mér finnst það mega auka fjölbreytileikann hjá konum eða taka fleiri konur inn.“
Hún segir að systrasamfélagið í bransanum sé sterkt. „Ég er búin að kynnast fullt af tónlistarkonum út frá samfélagsmiðlum og það er ótrúlega gaman að við séum að peppa hver aðra. Mér finnst eins og þetta sé að verða að einhverju.“
Sjá einnig: „Í dag er þetta eitthvað sem gerir mig sterkari“
Fylgstu með Katrínu Myrru á Instagram, TikTok og hlustaðu á tónlistina hennar á Spotify.
