Einnig er hægt að hlusta á Spotify eða hlaðvarpsþjónustu Google.

Heilsumarkþjálfinn, athafnakonan og stjörnuspekingurinn Hera Gísladóttir hefur alltaf haft áhuga á heilbrigði en hann jókst til muna eftir að flugfélagið WOW air fór á hausinn, þar sem hún starfaði sem flugfreyja.„Þá var ég svolítið á millikafla, hvað ætla ég að gera næst?“ segir hún.

Hún var stödd í matarboði með vinkonum sínum þegar það rann upp fyrir henni. „Við vorum fimmtán til tuttugu stelpur. Allar svona 27 ára. Við sátum allar á borði og svo byrjaði hringurinn: „Ég er með exem, ég er með magabólgur, ég er með kvíða, ég er með þunglyndi.“ Ég horfði á þær og það var hver og ein að segja eitthvað sem var að hrjá hana. Ég hugsaði, hvað er það? Er þetta eitthvað eitt? Er það maturinn okkar, eða svefninn? Hvað er þetta? Þá byrjaði þessi áhugi að kvikna hjá mér. Ég hef alltaf haft áhuga á heilbrigði en ég hugsaði þarna að ég þyrfti að finna eitthvað sem mig langar að læra sem tekur allar hliðar, svo sá ég þetta auglýst á netinu,“ segir hún um heilsumarkþjálfanámið í Bandaríkjunum.

„Þetta opnar hugann gagnvart því að heilsa er ekki bara eitthvað eitt. Það skiptir í rauninni ekkert máli hvað þú borðar mikið brokkolí ef þú ert síðan í óhamingjusömu sambandi.“

En komst hún að því hvað væri að hjá vinkonunum?

„Niðurstaðan er sú að við erum mannleg og það er ekki hægt að fá niðurstöðu. En ég komst að því að jú, til dæmis eins og stress og álag og það sem við sérstaklega, konur, erum að leggja á okkur. Ég var þannig 25 ára, ef ég var ekki í átta vinnum, með barnið og á öllum fótboltaleikjum, þá var ég ekki nógu góð,“ segir Hera og bætir við að hún hafi þurft að læra að slaka á og sýna sér mildi.

„Þá komst ég að því að þetta er stressið, þetta er mataræðið, þetta er svefninn. Þetta er samantektin, maður getur ekki bara verið góður í einhverju einu.“

Hvaða ráð gefurðu þeim sem eru að díla við of mikið stress?

„Eitt í einu. Það er það sem við gleymum, litlu hlutirnir. Þetta er allt þar, taktu bara eitthvað eitt. Hvað geturðu gert?“

Hera ræðir þetta nánar í spilaranum hér að ofan. Brotið er hluti af nýjasta þætti af Fókus sem má horfa á í heild sinni hér.

Fylgstu með Heru á Instagram.

Hlustaðu á Stjörnuspeki á Spotify og skoðaðu Orkugreining.is hér.