Fyrrum klámstjarnan og ketódrottningin Jenna Jameson greindi frá því í gær að hún væri gengin í hjónaband. Sú heppna er áhrifavaldurinn Jessi Lawless, en þær giftu sig í lítilli athöfn í borginni Las Vegas þann 23. maí.
„Ég fann manneskjuna sem ég hefði í alvörunni alltaf átt að vera með,“ sagði Jenna í samtali við People.
„Ég hef reynt að rekja það í huga mínum hvers vegna ég einu sinni stundaði það að vera í sambandi eða hjónabandi með karlmönnum, það er eigingjarnt og slæmt að upplýsa um það, en ég held að hvatinn hafi verið barneignir,“ sagði Jenna sem er þriggja barna móðir.
„Og nú þegar ég hef fundið sjálfa mig, þá hef ég loksins sæst við allt sem ég hef borið innan með mér og er ekki að bæla neitt niður“
Þetta er þriðja hjónaband klámleikkonunnar. Hún var áður gift svonefndum konungi klámsins – Brad Armstrong – á árunum 1996-2001 og síðan giftist hún fyrrum klámleikaranum Jay Grdina, en þau voru gift frá 2003-2007. Hún á svo fjórtán ára tvíbura með fyrrum kærasta sínum, UFC stjörnunni Tito Oritz, og svo sex ára dóttur með fyrrverandi unnusta sínum, athafnamanninum Lior Bitton.
Jenna kom út úr skápnum sem tvíkynhneigð árið 2004, en fór svo inn í skápinn aftur í samtali við Fox News fjórum árum seinna þegar hún sagðist vera algjörlega gagnkynhneigð.
Eiginkona Jennu, Jessi, er fertugur áhrifavaldur sem starfaði áður sem hársnyrtir. Frá því hefur verið greint að Jessi vissi ekki um fyrri störf eiginkonu sinnar þegar þær kynntust fyrst. Það var TikTok sem leiddi þær saman, en Jessi sá myndbönd með Jennu og varð strax hrifin. Jenna var þá helst þekkt fyrir að fjalla um ketó-mataræðið og tók það Jessi smá tíma að átta sig á því að þetta væri sú sama Jenna Jameson og sló í gegn í klámmyndum á árum áður, en Jenna var ein af þekktustu klámmyndaleikkonum heims á árunum 1993-2008.
Jessi var þó í sambandi þegar þær kynntust fyrst, en um leið og því sambandi lauk ákvað Jenna að freista gæfunnar. Þær byrjuðu svo saman í janúar og trúlofuðu sig í apríl.
„Ég vissi að ég myndi fá það sem ég vildi. Hún var þess virði. En hún var líka áskorun, og ég er mjög drífandi þegar kemur að áskorunum, svo ég vissi að ég þyrfti bara að liggja í leyni og bíða. Og hún sannfærðist síðan.“
Jenna hefur nú breytt um nafn á Instagram og bætt við eftirnafni eiginkonu sinnar, Jenna Jameson Lawless.
View this post on Instagram
