Aðdáendur hafa alltaf verið hrifnir af hári Jennifer Aniston. Á tíunda áratugnum var hárgreiðsla hennar goðsagnakennd, konur fóru á hárgreiðslustofur og báðu um „The Rachel“, sem var karakter Aniston í vinsælu gamanþáttunum Friends.
Rúmlega 20 árum seinna heldur hár leikkonunnar áfram að vekja athygli. Hún birti myndband á Instagram á dögunum þar sem hún var að auglýsa nýja vöru frá LolaVie, hársnyrtivörufyrirtæki hennar.
Það var ekki varan sem vakti athygli heldur sýnileg grá rót og hár á höfði leikkonunnar.
Náttúrulegt útlit Aniston hefur slegið í gegn hjá netverjum sem segja það hressandi að sjá Hollywood-stjörnu taka gráum hárum fagnandi frekar en að fela þau.
Í nýlegu viðtali við Glamour ræddi Aniston um stigmað í kringum grátt hár og sagði að konur ættu að vera við stjórnvölinn þegar kemur að eigin hári.
„Ef þú vilt vera með grátt hár, gerðu það! Ef þú vilt halda áfram að lita hárið þitt, það er frábært líka. Mér finnst eins og allir ættu að fá að taka eigin ákvarðanir og líða vel í eigin skinni,“ sagði hún.