TikTok- og OnlyFans-stjarnan Benný Blær Sæmundsen birti myndband á TikTok fyrr í vikunni þar sem sjá má áhrifavaldinn Brynjólf Löve Mogensen, kallaður Binni Löve, kyssa hana á munninn. Myndbandið hefur vakið mikla athygli á samfélagsmiðlinum en Benný sakar Brynjólf um kynferðislega áreitni í ljósi þess að hún hafi ekki gefið leyfi fyrir þessum kossi. Eftir nokkra umhugsun hafi hún ákveðið að birta myndbandið, sem var tekið upp fyrir nokkrum mánuðum, enda sé það ekki í hennar verkahring að fela hegðun Brynjólfs. „Þú kyssir ekki neinn án leyfis,“ segir hún í samtali við DV.
Eins og áður segir hefur myndbandið vakið mikla athygli á TikTok og hefur einnig valdið talsverðu fjaðrafoki á samfélagsmiðlum ekki síst eftir að klámstjarnan Ingólfur Valur Þrastarson, sem er ötull baráttumaður gegn kynferðisofbeldi, gagnrýndi athæfi Brynjólfs harðlega á Instagram.
@benny.blaer01 Elskum Binna Löve#xyzbca #fördig #fypシ #fyp #4u #iceland #💋 ♬ original sound – Benný Blær Sæmundsen
„Þetta kvöld var ég á rúntinum með strák sem ég var nýbyrjuð að hitta, ég skrúfaði niður gluggann og þá kom hann. Ég var að taka upp myndband og segjast hafa séð hann, en þá dró hann mig að sér og kyssti mig. Gæinn sem var með mér sagði bara: „Hver er þetta?“ Og ég sagði að hann hafi verið frægur einhvern tímann,“ segir Benný í samtali við DV.
Benný segir að eftir að hún birti myndbandið á TikTok hafi Brynjólfur haft samband við hana og hafi beðið hana um að eyða því.
„Það var þegar þessar athugasemdir voru að koma, það var í raun og veru verið að afhjúpa hann,“ segir Benný og er að vísa í fjölda athugasemda við myndbandið þar sem Brynjólfur er borinn þungum sökum.
Benný segir að hún hafi rætt við fólk sem hún þekkir eftir að Brynjólfur hafði samband. „Þá fattaði ég að það var hann sem kyssti mig en ekki ég. Af hverju spurði hann ekki bara um leyfi? Ég veit að fólk gerir ýmislegt þegar það er að drekka, en maður kemur ekki bara hálfur inn í bíl til að kyssa einhvern án leyfis og ef maður horfir á myndbandið þá sést alveg að mér er brugðið,“ segir hún og bætir við:
„Og af hverju á ég að fela þetta þegar hann veit sjálfur hvaða hlut hann á í þessu.“
Viðbrögðin við birtingu myndbandsins hafa verið mikil en Benný segist hafa fengið nafnlaus skilaboð á Instagram þar sem hún sé sökuð um að reyna að eyðileggja líf Brynjólfs.
„Er ekki bara kominn tími til að leyfa fólki að loksins opna sig um hluti sem það hefur lent í yfir tíðina. Það er löngu kominn tími til að sýna hver hann er í raun og veru. Hann er að brjóta á fólki með hegðun sinni. Auðvitað eru alltaf tvær hliðar á hverri sögu, en af hverju mega þolendur ekki stíga fram og segja sína sögu.“
DV hefur óskað eftir viðbrögðum frá Brynjólfi.