Ofurfyrirsætan Hailey Bieber er aftur að kljást við heilsukvilla. Hún greindi frá því á Instagram í gær að hún sé með stóra blöðru á eggjastokk.

„Ég er með blöðru í eggjastokk á stærð við epli. Ég er ekki með endómetríósu eða fjölblöðrueggjastokkaheilkenni en ég hef fengið blöðrur á eggjastokk nokkrum sinnum og það er aldrei gaman.“

Hún greindi frá því að hún finni fyrir smá sársauka og ógleði og sé útþembd með túrverki og afar viðkvæm.

„Allavega … ég er viss um að mörg ykkar tengið mikið við þetta og skiljið. Við reddum þessu.“

Hailey hefur áður opnað sig um heilsukvilla sem hún hefur glímt við. Hún fékk svokallaða heilablóðþurrð (transient ischemic attack, líka kallað mini-heilablóðfall) fyrr á árinu.

Það kom í kjölfar þess að hún fékk lítinn blóðtappa sem ferðaðist alla leið upp í gat í hjarta sem hún fæddist með og þaðan upp í heila. Gatið í hjartanu var óþekkt þar til þá og var með auðveldum hætti hægt að loka því. Kallaði Hailey því tappann ákveðna heppni.

Eiginmaður hennar, Justin Bieber, hefur einnig glímt við heilsubrest og var í sumar greindur með Ramsay Hunt-heilkennið.