Veitur greina frá því í dag að „Jóla-Gústi“ sé kominn til byggða. Margir spyrja sig þá eflaust hver þessi Jóla-Gústi sé, og er því auðsvarað enda birtu Veitur mynd af kauða á Facebook.
Jóla-Gústi er hátíðarbrunahani sem stendur vaktina fyrir utan Langholtsskóla. Veitur skrifa á Facebook:
„Hátíðarbrunahaninn Jóla-Gústi er kominn á stjá og mun standa vaktina fyrir utan Langholtsskóla um jólin. Þeir Ágúst Ástráðsson og Elvar Þór Ólafsson, starfsmenn vatnsveitunnar, komu honum fyrir í gær af öryggi og fagmennsku.
Jóla-Gústi er 6 ára gamall og á hverju ári finnum við honum nýjan stað um hátíðirnar. Nafnið fékk hann í höfuðið á Ágústi sem sér til þess að hann komist alltaf á sinn stað.“
Slökkviliðið á Höfuðborgarsvæðinu fagnar komu Jóla-Gústa og skrifa til Veitna: „Gott að vita að Jóla Gústi sé mættur – vel gert Veitur.“
Í fyrra stóð Jóla-Gústi vaktina í Skerjafirði á gatnamótum Bauganess og Einarsness. Þá beindi Jóla Gústi þeim skilaboðum til landsmanna að fara varlega og huga eldvörnum heimilisins yfir hátíðirnar.